“Daryo” nashri 23-dekabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Putin urushni tugatish tarafdori ekanini aytdi. Urushni tadqiq qilish instituti vaziyatni qanday baholaydi?
Rossiya prezidenti Vladimir Putin Ukrainadagi urushni tezroq tugatish tarafdori ekanini aytdi. Bu haqda “Interfaks” xabar berdi.
Jangovar harakatlarning borishi haqida gapirar ekan, Putin “jangovar harakatlarning kuchayishi asossiz yo‘qotishlarga olib kelishi”ni ta’kidlagan
ISW tahlilchilarining fikricha, bu bayonotlar Rossiyaning noreal maqsadlariga erishish uchun tobora ko‘proq qurbon berishga majbur bo‘layotgan mahalliy rus auditoriyasiga Putinning qimmatga tushgan urushini oqlash bo‘yicha Kreml sa’y-harakatlarining bir qismi.
Putin mas’uliyatni yuklamoqchi bo‘lganlardan biri — Rossiya Qurolli kuchlari Bosh shtabi boshlig‘i Valeriy Gerasimov, deydi ISW mutaxassislari. U yaqinda uzoq tanaffusdan so‘ng birinchi marta OAV da ko‘rsatilgan.
Ukrainada urush boshlanganiga bir yil to‘ladigan sanada Zelenskiyning tinchlik rejasi e’lon qilinadi
Ukraina prezidenti Vladimir Zelenskiyning jamoasi tinchlikka erishish bo‘yicha reja tafsilotlarini ishlab chiqmoqda. Bu haqda The Wall Street Journal Yevropa va Ukraina diplomatlariga tayanib xabar berdi.
Takliflarni taxminan Ukrainada urush boshlanganiga bir yil to‘ladigan sanada, 24-fevral kuni taqdim etish ko‘zda tutilmoqda. AQSH, Ukraina va NATO mansabdorlarining so‘zlariga ko‘ra, Kiyevning har qanday ehtimoliy muzokaralardagi pozitsiyasi uning jang maydonidagi pozitsiyasiga bog‘liq bo‘ladi.
Eslatib o‘tamiz Noyabr oyidagi katta yigirmatalik sammitida Zelenskiy urushni tugatishning qator shartlarini sanab, Rossiya Ukrainaning hududiy yaxlitligini tasdiqlashi, o‘z qo‘shinlarini mamlakat hududidan olib chiqib ketishi, shuningdek, urushdan yetkazilgan zararni qoplashi kerakligini aytgandi.
Ukraina yetakchisi Minsk kelishuvlariga qaytilishini istisno qilgan, chunki, uning so‘zlariga ko‘ra, ular darhol buziladi.
Yevgeniy Prigojin Vagner guruhi Shimoliy Koreyadan qurol yarog’ olayotganini rad etdi
KXDR anchadan buyon Rossiyaga hech qanday qurol-yarog‘ yetkazmayapti va bunga uringani ham yo‘q. AQSH Milliy xavfsizlik kengashi vakili Jon Kirbining bunday yetkazmalar haqidagi gaplari uydirma, dedi “Vagner” xususiy harbiy kompaniyasi asoschisi, Yevgeniy Prigojin.
Prigojin qayd etishicha, “Vagner” guruhi “yetarlicha ko‘p miqdorda” Amerika qurol-yarog‘larini sotib oladi va uning huquqshunoslari AQSHning “Vagner”ga qurol yetkazib berishga nisbatan cheklovlari bekor qilinishiga erishadi.
Shuningdek, Shimoliy Koreya Tashqi ishlar vazirligi ham bayonot e’lon qilib, KXDR Rossiya qurol yetkazib bermayotgani, Moskva “boshqalarning yordamisiz ham” o‘zini himoya qilishga qodirligini aytgan.
Avvalroq Reuters agentligi AQSHning yuqori martabali mulozimiga tayanib, Rossiyaning “Vagner” guruhi Shimoliy Koreyadan qurol-yarog‘ sotib olganini ma’lum qilgandiManbaning ta’kidlashicha, “Vagner” xususiy harbiy kompaniyasining Ukrainadagi urushdagi roli ortib bormoqda. Kreml tomonidan nazorat qilinadigan harbiy kompaniya yangi qurollar uchun pul to‘lagan, xususan, KXDR vagnerlarga raketa va snaryadlar yuborgan.
Qoraqalpog‘istonda shamol elektr stansiyasi quriladi. Bu gaz va elektr energiyasi yetkazilishida qanchalik ahamiyatli?
Toshkent shahrida 23-dekabr kuni Saudiya Arabistonining ACWA Power kompaniyasi bilan Qoraqalpog‘istonda umumiy quvvati 1500 MVt bo‘lgan shamol elektr stansiyasini qurish bo‘yicha shartnomalar imzolandi.
Qayd etilishicha, mazkur yirik quvvatli shamol elektr stansiyasi 2026-yilda ishga tushirilishi, yiliga 5,2 milliard kVt/soat elektr energiyasi ishlab chiqarishi va buning natijasida yiliga 1,5 milliard kub metr tabiiy gaz tejalishi rejalashtirilgan.
Stansiyada 300 MVt—550 MVt/soat elektr saqlash kimyoviy batareyalari (akkumulyatorlar) o‘rnatiladi. Ushbu batareyalar shamol turbinalaridan chiquvchi o‘zgaruvchan elektr energiyasini rostlab beradi.
Izoh (0)