Saudiya Arabistoni klublari “Manchester Yunayted” yarim himoyachisi Kazemiro uchun 30 million yevro to‘lashga tayyor. Bu haqda jurnalist va insayder Ben Jeykobs X (sobiq Twitter) ijtimoiy tarmog‘ida xabar berdi.
Manbaga ko‘ra, braziliyalik futbolchi ingliz klubini tark etishga qarshi emas. Ta’kidlanishicha, agar Kazemiro “An-Nassr” transferiga rozi bo‘lsa, u Saudiya Pro ligasidagi eng yuqori maosh oladigan besh futbolchi qatoridan joy oladi.
Avvalroq xabar berilganidek, Ar-Riyod jamoasi rahbariyati Kazemironing Krishtianu Ronaldu bilan yaxshi munosabatlari haqida ma’lumotga ega, bu esa transfer ehtimolini oshiradi.
O‘tgan yozda “Al-Ittihod” braziliyalik futbolchini o‘z safiga qo‘shib olishga urinib ko‘rgan edi, biroq Saudiya klubi futbolchi uchun so‘ralgan 70 million yevroni to‘lashga tayyor emasdi.
Joriy mavsumda 32 yoshli Kazemiro “Manchester Yunayted” safida barcha musobaqalarda 22 ta o‘yinda qatnashib, 3 ta gol urishga muvaffaq bo‘ldi. Futbolchining hozirgi shartnomasi 2026-yil yoziga qadar mo‘ljallangan. Transfermarkt portali ma’lumotlariga ko‘ra, uning bozor qiymati 12 million yevroni tashkil etadi.
Izoh (0)