Саудия Арабистони клублари “Манчестер Юнайтед” ярим ҳимоячиси Каземиро учун 30 миллион евро тўлашга тайёр. Бу ҳақда журналист ва инсайдер Бен Жейкобс Х (собиқ Twitter) ижтимоий тармоғида хабар берди.
Манбага кўра, бразилиялик футболчи инглиз клубини тарк этишга қарши эмас. Таъкидланишича, агар Каземиро “Ан-Насср” трансферига рози бўлса, у Саудия Про лигасидаги энг юқори маош оладиган беш футболчи қаторидан жой олади.
Аввалроқ хабар берилганидек, Ар-Риёд жамоаси раҳбарияти Каземиронинг Криштиану Роналду билан яхши муносабатлари ҳақида маълумотга эга, бу эса трансфер эҳтимолини оширади.
Ўтган ёзда “Ал-Иттиҳод” бразилиялик футболчини ўз сафига қўшиб олишга уриниб кўрган эди, бироқ Саудия клуби футболчи учун сўралган 70 миллион еврони тўлашга тайёр эмасди.
Жорий мавсумда 32 ёшли Каземиро “Манчестер Юнайтед” сафида барча мусобақаларда 22 та ўйинда қатнашиб, 3 та гол уришга муваффақ бўлди. Футболчининг ҳозирги шартномаси 2026 йил ёзига қадар мўлжалланган. Transfermarkt портали маълумотларига кўра, унинг бозор қиймати 12 миллион еврони ташкил этади.
Изоҳ (0)