Avvalroq “Al-Nassr” va Portugaliya terma jamoasi hujumchisi Krishtianu Ronaldu Globe Soccer Awards marosimida bu yilgi “Oltin to‘p” aslida Vinisiusga topshirilishi kerak bo‘lganini aytgandi.
Ispaniya terma jamoasi va “Manchester Siti” klubi yarim himoyachisi Rodri Krishtianu Ronalduning “Oltin to‘p” sovrini borasidagi fikrlariga munosabat bildirdi.
Jumladan, Rodri Ronalduning “Oltin to‘p”ni Vinisiusga topshirilishi kerakligi haqida aytgan gaplariga izoh berdi.
“Nima ham deya olaman, bu men uchun syurpriz bo‘ldi, chunki u bu tizim qanday ishlashi, g‘olib qanday usulda tanlanishini hammadan ham ko‘proq va yaxshiroq biladi. Bu yil sovrin menga nasib qilishi kerak deb hisoblagan jurnalistlarning baʼzilari, balki, vaqtida unga ham ovoz bergandir. O‘ylashimcha, o‘shanda Krishtianu ularning qarorini to‘liq qo‘llab-quvvatlagan”, deydi ispaniyalik futbolchi.
Maʼlumot uchun, Globe Soccer Awards marosimda Krishtianu Ronaldu 2024-yilning eng yaxshi Sharq futbolchisi va barcha davrlarning eng yaxshi to‘purari bo‘ldi. Vinisius esa yil futbolchisi deb topildi.
Izoh (0)