AQSHning saylangan prezidenti Donald Tramp lavozimga kirishganidan keyin ham Ukrainaga yordam berishni davom ettirishni rejalashtirmoqda. Bu haqda respublikachi jamoasiga tayanib Financial Times (FT) xabar berdi.
FT manbalariga ko‘ra, Tramp NATO a’zolaridan mudofaa xarajatlarini yalpi ichki mahsulotning 5 foizigacha oshirishni talab qilmoqchi. Muzokaralar bilan tanish shaxslarga ko‘ra, AQSH saylangan prezidentining tashqi siyosat bo‘yicha eng yaqin yordamchilari joriy oydagi maslahatlashuvlar chog‘ida Yevropaning yuqori martabali amaldorlarini uning pozitsiyasi haqida xabardor qilgan.
Nashrning qayd etishicha, hozirda NATOning 32 a’zosidan atigi 23 tasi harbiy ehtiyojlarga o‘z yalpi ichki mahsulotining kamida 2 foizini sarflamoqda. Bu xarajatlarni 5 foizgacha oshirish ularni ikki baravar ko‘paytirishni anglatadi.
Trampning rejalari bilan tanish bo‘lgan Yevropa amaldorlaridan biri nashr bilan suhbatda gap YIMning “uch yoki undan ko‘proq foizi” haqida borayotganini ta’kidlagan. Unga ko‘ra, AQSH bu mavzuni 2025-yil iyun oyida Gaagada bo‘lib o‘tadigan Shimoliy Atlantika alyansining sammitida muhokama qilish niyatida.
Oq uy ma’lumotlariga ko‘ra, 2024-yilda AQSHning mudofaa xarajatlari YIMning taxminan 3,1 foizini tashkil etadi. FT’ning qayd etishicha, Trampning birinchi prezidentlik muddatining so‘nggi yilida (2020-yilda) Pentagon xarajatlari 3,4 foizga yetgan.
NATOning asosiy a’zo davlatlari - Germaniya, Fransiya, Buyuk Britaniya, Italiya va Polsha vakillari, shuningdek, alyans bosh kotibi Mark Ryutte 18-dekabr kuni Bryusselda Ukraina prezidenti Vladimir Zelenskiy bilan uchrashuv o‘tkazgan edi. Muhokamalarning muhim mavzusi Tramp Oq uyga qaytganidan so‘ng Yevropa xavfsizlik siyosatining kelajak yo‘nalishlari bo‘ldi.
Germaniya kansleri Olaf Shols 19-dekabr kuni Tramp bilan telefon orqali suhbatlashdi. Ushbu suhbatdan so‘ng Germaniya hukumati rahbari jurnalistlarga “AQSH va Yevropaning Ukrainaga yordam ko‘rsatishni davom ettirishi”ga to‘liq ishonishini aytdi.
Zelenskiy Bryusseldagi Yevropa kengashi yig‘ilishidan keyingi matbuot anjumanida AQSH va Yevropa ittifoqining Kiyev uchun birgalikdagi xavfsizlik kafolatlari muhimligini ta’kidladi.
“Yevropaning kafolatlari Ukraina uchun yetarli bo‘lmaydi. Buni faqat Yevropa yetakchilari bilan muhokama qilish mumkin emas. Biz uchun, bugungi kunda yoki kelajakda bo‘lishidan qat’i nazar, haqiqiy kafolatlar — bu NATO. NATO esa ham AQSH, ham Yevropa yetakchilarining qarorlariga asoslanadi”, deydi Ukraina yetakchisi.
Izoh (0)