Yevropa komissiyasi rahbari Ursula fon der Lyayen ikkinchi muddatga saylanishi oldidan o‘zining siyosiy dasturida Yevropa Ittifoqini mudofaa ittifoqiga aylantirish rejalarini e’lon qildi.
Shu maqsadda u mudofaa bo‘yicha Yevropa komissarini tayinlash, sarf-xarajatlarni ko‘paytirish va harbiy salohiyatni oshirishga qaratilgan yondashuvlarni belgilash niyatida.
Kreml Yevropa Ittifoqining bunday rejalari Rossiyani tegishli tashqi siyosatni shakllantirishga majbur qilishini bildirdi.
“So‘nggi bir necha yil bizning mudofaa qobiliyatimiz yetarli darajada moliyalashtirilmayotganini va noto‘g‘ri boshqarilayotganini ko‘rsatib qo‘ydi”, deyiladi dasturda.
Taqqoslash uchun Ursula fon der Lyayen quyidagi raqamlarni keltirdi: 2019-yildan 2021-yilgacha Yevropa Ittifoqining mudofaa xarajatlari 20 foizga oshdi, Rossiya bu ko‘rsatkichni deyarli 300 foizga, Xitoy esa 600 foizga oshirdi.
Yevropa Ittifoqining mudofaa xarajatlari bir-biriga mos kelmaydi va Yevropa standartlariga javob bermaydi, deb taʼkidladi YI rahbari.
“A’zo davlatlar har doim o‘z qo‘shinlari uchun mashg‘ulotlar o‘tkazishga va ularni joylashtirishga javobgar bo‘ladilar, ammo Yevropa mudofaa sanoati bazasini mustahkamlash bo‘yicha sa’y-harakatlarni qo‘llab-quvvatlash va muvofiqlashtirish uchun juda ko‘p ish qilinishi kerak”, dedi Ursula fon der Lyayen.
Rossiya prezidenti matbuot kotibi Dmitriy Peskovning aytishicha, Ursula fon der Lyayenning YIni mudofaa ittifoqiga aylantirish rejalari keskinlikni kuchaytirish va tashqi siyosatdagi qarama-qarshilikni yaratishga intilishni tasdiqlaydi.
“Bu biz qabul qilishimiz kerak bo‘lgan haqiqatlar. Va, albatta, bularning barchasi bizni tashqi siyosiy yondashuvimizni shunga mos ravishda o‘zgartirishga majbur qiladi”, dedi Kreml vakili.
Izoh (0)