Eronda prezidentlikka jami 80 kishi, jumladan, to‘rt nafar ayol nomzodini ko‘rsatgandi. “Konstitutsiyani qo‘riqlash kengashi” ularning olti nafarini saralab, saylovda qatnashishiga ruxsat berdi. Bu haqda Mehr agentligi xabar berdi.
Davlat rahbari lavozimga rasmiy nomzodlar quyidagilar (rasmda o‘ngga qarab ketma-ketlikda berilgan):
- Eron Oliy yetakchisining Milliy xavfsizlik oliy kengashidagi vakili Said Jaliliy (tepadan birinchisi),
- Eron sobiq sog‘liqni saqlash va tibbiy taʼlim vaziri, parlament aʼzosi Masud Pezeshkiyan,
- Parlamentning amaldagi spikeri Muhammad Bag‘er G‘olibaf,
- Tehron meri Alirizo Zakaniy (pastdan birinchisi),
- Ichki ishlar vazirligi sobiq rahbari, din arbobi Mustafa Purmuhammadiy.
- Shahidlar va faxriylar fondi rahbari Amir-Husayn G‘ozizoda-Hoshimiy
Eronning ikki taniqli siyosatchisi – sobiq prezident Mahmud Ahmadinajod va parlament sobiq spikeri Ali Larijoniyning nomzodlari ma’qullanmagan. Bundan tashqari nomzodlikka ko’rsatilgan to‘rt nafar ayol ham saralashdan o‘tmagan. Shu kungacha eronlik birorta ayol nomzodlarning yakuniy ro‘yxatiga kiritilmagan. Eron prezidenti Ibrohim Raisiy aviahalokatda vafot etishi sababli 28-iyun kuni mamlakatda muddatidan oldingi prezidentlik saylovlari bo‘lib o‘tadi. Eronda prezident vazifasini bajaruvchi Muhammad Moxber saylovlarda qatnashishdan bosh tortgan.
Prezident Raisiy vafoti
19-may kuni Eron prezidenti Ibrohim Raisiy aviahalokat natijasida vafot etdi. Mamlakat shimoli-g‘arbida Eron prezidenti va tashqi ishlar vaziri bo‘lgan vertolyot halokatga uchragandi. Kuchli tuman va tog‘li hudud tufayli halokatga uchragan vertolyotni qidirish 10 soatdan ortiq davom etgan. Mutaxassislar fikricha, falokat texnik nosozlik yoki inson omili tufayli yuz bergan bo‘lishi mumkin. Raisiy vafoti munosabati bilan Eronda besh kunlik motam e’lon qilingan.
Izoh (0)