Bortida Malavi vitse-prezidenti Saulos Chilima va unga hamrohlik qilgan to‘qqiz kishi bo‘lgan samolyot halokatga uchradi, ularning hech biri omon qolmadi. Bu haqda Malavi prezidenti administratsiyasiga tayanib, The Sun xabar berdi.
“Bortida vitse-prezident, hurmatli doktor Saulos Chilimani olib ketayotgan samolyot 11-iyun kuni ertalab Chikangava o‘rmonida topildi. Afsuski, halokat natijasida bortdagilarning barchasi halok bo‘ldi”, — deyiladi prezident administratsiyasi xabarida.
Malavi yetakchisi Lazarus Chakvera mamlakatda milliy motam e’lon qildi va bugundan boshlab dafn marosimigacha barcha bayroqlar yarim tushirilishini aytdi. Halokatga uchragan samolyotda vitse-prezidentdan tashqari sobiq birinchi xonim Patrisi Shanil Muluzi ham bo‘lgan. U 1994-yildan 2004-yilgacha mamlakat rahbari bo‘lib ishlagan Malavining ikkinchi prezidenti Bakili Muluzining rafiqasi edi.
Malavi vitse-prezidenti Saulos Chilima 51 yoshda bo‘lgan. Uning rafiqasi va ikki nafar farzandi bor. Chilima 2014-yildan beri vitse-prezident lavozimida ishlab kelayotgandi.
U va yana to‘qqiz kishi bo‘lgan samolyot 10-iyun kuni ertalab Lilongvedan havoga ko‘tarilganidan so‘ng radarlardan g‘oyib bo‘lgan. Samolyot mahalliy vaqt bilan soat 10:00 dan keyin mamlakat shimolidagi Mzuzu xalqaro aeroportiga qo‘nishi kerak edi. Aviatexnika sobiq adliya vaziri Ralf Kasambaraning dafn marosimiga uchayotgan edi.
Ma’lumot o‘rnida, 19-may kuni Eron prezidenti Ibrohim Raisiy aviahalokat natijasida vafot etgandi. Mamlakat shimoli-g‘arbida Eron prezidenti va tashqi ishlar vaziri bo‘lgan vertolyot halokatga uchragandi. Kuchli tuman va tog‘li hudud tufayli halokatga uchragan vertolyotni qidirish 10 soatdan ortiq davom etgan. Mutaxassislar fikricha, falokat texnik nosozlik yoki inson omili tufayli yuz bergan bo‘lishi mumkin. Raisiy vafoti munosabati bilan Eronda besh kunlik motam e’lon qilingandi.
Izoh (0)