Eron rahbari Ibrohim Raisiy bo‘lgan vertolyotga hamrohlik qilgan boshqa vertolyotdagi prezident administratsiyasi rahbari G‘ulom-husayn Esmalili aviahalokat tafsilotlarini ma’lum qildi. Bu haqda IRNA xabar berdi.
Esmalili parvoz paytida ob-havo sharoiti qulay bo‘lgani, osmonning faqat bir qismida bulut kuzatilganini aytdi.
Parvozdan yarim soat o‘tgach, Sungun mis koni yaqinida osmon bulutli edi, lekin tuman emasdi. Ehtimol, darada chuqur tuman bor edi, lekin parvoz yo‘li davomida tuman yo‘q edi. Bulutlar vertolyotdan biroz balandroq edi. Bortida prezident bo‘lgan vertolyot uchuvchisi qo‘mondon sifatida bizga balandlikka ko‘tarilish va bulutlar ustida harakatlanishni davom ettirish bo‘yicha ko‘rsatmalar berdi, — deydi u.
Ta’kidlanishicha, vertolyotlar balandlikni oshirgan va taxminan 30 soniyadan so‘ng prezident vertolyoti yo‘qolgani ma’lum bo‘lgan.
Uchuvchimiz orqaga qaytib, vertolyotni izladi. Menga vertolyot qulagan bo‘lishi mumkinligini aytishdi, chunki bir yarim daqiqa aloqa bo‘lmadi. Vertolyotimiz bir necha marta aylanib chiqdi va radio aloqa o‘rnatolmadi. Sungun koniga 30 soniyada qo‘ndik, — deydi Esmalili.
Dastlab vertolyot yo‘lovchilari bilan bog‘lanish imkoni bo‘lmagan.
Keyin bizga kapitan Mustafoviyning telefoniga qo‘ng‘iroq qilishgani, samolyot daraga tushib ketganini aytishdi, lekin nima yuz berganini ochiqlashmadi. Keyin bortdagi Sharqiy Ozarbayjon gubernatori Oyatulloh al-Hoshim bilan bog‘langanimda, u shunday dedi: “O‘zimni yaxshi his qilmayapman, nima bo‘lganini bilmayman, qayerda ekanimni ham bilmayman, daraxtlar ostidaman, hech kimni ko‘rmayapman, yolg‘izman”, — deya eslaydi Esmalili.
Sharqiy Ozarbayjon gubernatori vertolyot qulagan o‘rmonni tasvirlagan. Shundan keyin Eron prezidenti administratsiyasi rahbari tez yordam va tibbiyot xodimlarini olib, voqea joyiga borgan.
Janob al-Hoshim bilan bir necha bor gaplashdik, u qo‘ng‘iroqlarga uch soatcha javob berdi. Keyin hamma bir vaqtning o‘zida vafot etgani ma’lum bo‘ldi, janob al-Hoshim bir necha soatdan keyin vafot etdi. Na portlash ovozi, na olov, na tutun ko‘rindi, — deydi Esmalili.
Ta’kidlanishicha, voqea joyiga qutqaruvchilar yetib kelganida, ob-havo butunlay o‘zgargan. Parvoz paytida ob-havo sharoiti normal edi.
Biz bulutni faqat bitta darada va juda cheklangan hududda ko‘rgandik, bu parvozga to‘sqinlik qilgan omil bo‘lishi mumkinmi yoki yo‘qmi, ayta olmayman”, — deya xulosa qildi amaldor.
Eslatib o‘tamiz, 19-may kuni Eron prezidenti Ibrohim Raisiy aviahalokat natijasida vafot etdi. Mamlakat shimoli-g‘arbida Eron prezidenti va tashqi ishlar vaziri bo‘lgan vertolyot halokatga uchragandi.
Kuchli tuman va tog‘li hudud tufayli halokatga uchragan vertolyotni qidirish 10 soatdan ortiq davom etgan. Mutaxassislar fikricha, falokat texnik nosozlik yoki inson omili tufayli yuz bergan bo‘lishi mumkin. Raisiy vafoti munosabati bilan Eronda besh kunlik motam e’lon qilingan. Eron prezidentining dafn marosimi 23-may kuni Mashhad shahrida bo‘lib o‘tadi. Muddatidan oldin prezidentlik saylovlari 28-iyunga belgilangan.
Izoh (0)