Polsha 2025-yil yozigacha Belarus bilan chegarasiga devor qurib, uni butunlay yopishni rejalashtirmoqda. Bu haqda Polshaning migratsiya masalalari bo‘yicha vazir o‘rinbosari Matsey Dushchik ma’lum qildi.
Uning aytishicha, qurilish tugagandan so‘ng, uzunligi 418 kilometrni tashkil etadigan Belarus bilan chegaraning xavfsizligi “deyarli yuz foizga yetadi”. Polshaning avvalgi hukumati allaqachon Belarus bilan chegarada uzunligi 180 kilometr va balandligi 5,5 metr bo‘lgan to‘siq qurgandi.
2023-yil oxirida hokimiyatga kelgan yangi bosh vazir Donald Tusk davrida Polsha nafaqat devorni uzaytirmoqda, balki Belarus bilan chegarada tungi ko‘rish kameralari va teplovizor o‘rnatmoqda. Chegara hududini nazorat qilish uchun yangi yo‘l ham qurilmoqda.
Varshava kelgusi oylarda Rossiyaning Kaliningradiga borish uchun yangi yo‘l quradi. Bu Polsha qo‘shinlariga ehtimoliy xavfsizlikka tahdidlarda tezroq reaksiya bildirish imkonini beradi, dedi Dushchik.
Dushchikning ta’kidlashicha, mamlakat chegarani himoya qilish uchun 587 million yevro sarflamoqda, buning yarmini Tusk hukumati ajratgan. Polsha 2021-yilda Belarus bilan chegarada devor qurishni boshlagan, o‘shanda u orqali noqonuniy muhojirlar oqimi keskin ko‘paygandi. Varshavada amaldorlar Aleksandr Lukashenko rejimi ataylab migratsiya inqirozini uyushtirayotganini aytib, Belarusni “gibrid urush” olib borayotganlikda ayblagan.
Izoh (0)