Польша 2025 йил ёзигача Беларусь билан чегарасига девор қуриб, уни бутунлай ёпишни режалаштирмоқда. Бу ҳақда Польшанинг миграция масалалари бўйича вазир ўринбосари Матсэй Душчик маълум қилди.
Унинг айтишича, қурилиш тугагандан сўнг, узунлиги 418 километрни ташкил этадиган Беларусь билан чегаранинг хавфсизлиги “деярли юз фоизга етади”. Польшанинг аввалги ҳукумати аллақачон Беларусь билан чегарада узунлиги 180 километр ва баландлиги 5,5 метр бўлган тўсиқ қурганди.
2023 йил охирида ҳокимиятга келган янги бош вазир Дональд Туск даврида Польша нафақат деворни узайтирмоқда, балки Беларусь билан чегарада тунги кўриш камералари ва тепловизор ўрнатмоқда. Чегара ҳудудини назорат қилиш учун янги йўл ҳам қурилмоқда.
Варшава келгуси ойларда Россиянинг Калининградига бориш учун янги йўл қуради. Бу Польша қўшинларига эҳтимолий хавфсизликка таҳдидларда тезроқ реакция билдириш имконини беради, деди Душчик.
Душчикнинг таъкидлашича, мамлакат чегарани ҳимоя қилиш учун 587 миллион евро сарфламоқда, бунинг ярмини Туск ҳукумати ажратган. Польша 2021 йилда Беларусь билан чегарада девор қуришни бошлаган, ўшанда у орқали ноқонуний муҳожирлар оқими кескин кўпайганди. Варшавада амалдорлар Александр Лукашенко режими атайлаб миграция инқирозини уюштираётганини айтиб, Беларусни “гибрид уруш” олиб бораётганликда айблаган.
Изоҳ (0)