Belarus Xavfsizlik kengashi davlat kotibi Aleksandr Volfovich mamlakat chegarasi yaqinida Polsha 17 ming nafargacha qurolli kuchlar guruhini joylashtirganini aytdi.
Polshada chegarani kuchaytirish bahonasi bilan ‘Xavfsiz Podlyasye’ operatsiyasi doirasida 17 ming kishigacha bo‘lgan guruh joylashtirilgan, shundan 8 ming nafari bevosita chegaralarimiz yonida turibdi, dedi u.
Volfovichning aytishicha, Polsha Litva, Latviya va Estoniya bilan birgalikda go‘yoki Belarus bilan chegaradagi vaziyatni keskinlashtirish siyosatini davom ettirmoqda. U hozirgi paytda Polshada tanklar va jangovar mashinalar soni ko‘payganini aytdi.
Avvalroq Volfovich Belarus janubidagi davlat chegarasini qo‘riqlash va mudofaa qilish kuchaytirilgani, qo‘shinlar to‘satdan hujum ehtimolining oldini olish uchun mudofaani mustahkamlayotganini aytgandi. Bundan tashqari u Belarus chegarasi yaqinida Ukraina taxminan 14 ming askardan iborat harbiy to‘plaganini bildirgan. Bunga javoban Belarus hukumati Mozir va Gomel yo‘nalishlarini kuchaytirishga qaror qilgan.
Ukraina Tashqi ishlar vazirligi esa Belarus harbiy mashqlar niqobi ostida chegara yaqinida ko‘p sonli shaxsiy tarkib va harbiy texnika to‘plaganini ma’lum qilgan. Chegara buzilgan taqdirda Ukraina “o‘zini himoya qilish choralari”ni ko‘rishi, Belarus qo‘shinlarining to‘planishi esa “Ukraina Qurolli kuchlari uchun qonuniy nishon”ga aylanishi haqida vazirlik ogohlantirgan.
Izoh (0)