2024-yilda Qozog‘iston armiyasi 100 dan ortiq jangovar texnika va samolyotlarni qabul qildi, deb xabar berdi Respublika Mudofaa vazirligi.
Qozog‘iston Turkiyaning “Bayraktar” dronlarini ham olish niyatida. Avvaliga armiyani dronlar bilan qurollantirish, keyinroq esa dronlarni Qozog‘istonda ishlab chiqarishni yo‘lga qo‘yish rejalashtirilgan.
Qozog‘iston mudofaa vaziri Ruslan Jaqsiliqov Baykar Defence ishlab chiqaruvchi kompaniyasi bosh direktori Haluk Bayraktar bilan dronlarni yetkazib berish masalasini muhokama qildi.
Ular Istanbuldagi Saha Expo ko‘rgazmasida uchrashishdi. Qozog‘iston harbiy delegatsiyasi Turkiyaning “Havelsan” (mudofaa sohasi uchun elektron uskunalar va dasturiy taʼminot ishlab chiqaradi), “Aselsan” (havo, quruqlik va dengiz kuchlari uchun mahsulotlar chiqaradi) hamda “Transvaro” qurol ishlab chiqaruvchi kompaniyalari zavodlarida ham bo‘ldi.
Muzokaralar natijasida Baykar Qozog‘istonga Bayraktar Kalkan, Bayraktar Mini dronlari va Mosquito-X o‘q-dorilarini harbiy sinovlar uchun bepul taqdim etishi haqida protokol imzolandi. Qancha qurilmalar yetkazib berilishi va qaysi vaqt oralig‘ida yetkazilishi maʼlum qilinmagan.
Hozirgi vaqtda Qozog‘iston armiyasi Sovet Ittifoqining “Buk-M2E”, “Tor-M2K” zenit-raketa komplekslari, Belarusiyaning “Rosa-RB”, “Platforma” radiolokatsion stansiyalari, shuningdek, Qozog‘istonning “Nur” radarlari bilan qurollangan.
Noyabr oyida Qozog‘iston prezidenti Qosim-Jomart To‘qayev Ukrainadagi vaziyat fonida mamlakatdagi muhim fuqarolik va harbiy obyektlarni zudlik bilan qo‘riqlashni buyurgan edi.
Izoh (0)