Rossiyaning havo hujumiga qarshi mudofaa tizimlari 26-dekabrga o‘tar kechasi Saratov viloyatidagi Engels harbiy aerodromiga yaqinlashib kelayotgan Ukraina dronini urib tushirdi. Bu haqda Rossiya Mudofaa vazirligiga tayanib, “RIA Novosti” xabar berdi.
Vazirlik ma’lumotiga ko‘ra, dron qismlarining qulashi oqibatida uch nafar harbiy xizmatchi og‘ir tan jarohati olgan, uch kishi halok bo‘lgan. Aerodromdagi samolyotlarga zarar yetmagan. Engelsdagi portlash haqidagi xabarlar dastlab ijtimoiy tarmoqlarda paydo bo‘ldi. Shaharda sirena sadolari aks etgan videolar namoyish qilindi. Shuningdek, portlashning videokuzatuv kamerasidagi tasviri ham e’lon qilindi.
Ta’kidlanishicha, aerodromdagi portlashdan so‘ng 120 kvadrat metr maydonda yong‘in chiqqan.
Saratov viloyati gubernatori Roman Busargin Engels aholisi uchun “hech qanday” xavf yo‘qligi, turar joylarda favqulodda vaziyatlar kuzatilmaganini aytdi.
“Fuqarolik infratuzilmasi obyektlari zarar ko‘rmadi. Harbiy obyektdagi hodisa haqidagi ma’lumotlar huquq-tartibot idoralari tomonidan tekshirilmoqda”, — deya qo‘shimcha qildi u.
5-dekbar kuni Rossiya Mudofaa vazirligi Ukraina Saratov va Ryazan viloyatlaridagi harbiy aerodromlarga dron bilan hujum qilishga uringani, oqibatda uch harbiy halok bo‘lganini ma’lum qilgandi. Bunga javoban Rossiya Ukraina harbiy qo‘mondonlik va nazorat tizimi va tegishli mudofaa 17 ta obyektlariga kuchli zarba bergan.
Rossiya ommaviy axborot vositalarida Ukraina Qurolli kuchlariga tegishli dronlar Qozog‘iston hududidan uchirilgani haqida xabar tarqalgan. Respublika Mudofaa vazirligi mazkur xabarni rad etgan.
Izoh (0)