Bugun 21-dekabr kuni Qozon shahrida sakkizta dron hujumi qayd etildi. Ulardan oltitasi turar joy binolariga urilgan, deya xabar bermoqda “TASS” hukumatga tayanib.
Dastlabki ma’lumotlarga ko‘ra, dron hujumlari oqibatida halok bo‘lganlar va jarohatlanganlar yo‘q, deb yozadi agentlik.
Dronlar Kamaleyev prospektidagi "Moviy osmon" turar joy majmuasiga (bu shahardagi eng baland bino, deb yozadi "CautionNews" kanali), Orenburgskiy traktidagi "Manxetten" turar joy majmuasiga va Klara Tsetkin ko‘chasidagi besh qavatli turar joy binosiga qulagan.
Tatariston rahbari Rustam Minnixanov "Moviy osmon" turar joy majmuasiga yetib kelgan.
Rossiya Mudofaa vazirligi Tatariston osmonida bitta dron urib tushirilganini ma'lum qildi.
Tatariston hukumati dronlar hujumi tufayli yaqin ikki kun davomida barcha ommaviy tadbirlarni bekor qildi, deya xabar bermoqda “Interfaks” Tatariston rahbari matbuot xizmatiga tayanib.
“Tatariston Respublikasi tuman Kengashi qaroriga ko‘ra, xavfsizlikni taʼminlash maqsadida yaqin ikki kun ichida (shanba, yakshanba) respublikadagi barcha ommaviy tadbirlar bekor qilindi”, deyiladi xabarda.
Qozon meriyasi dron hujumi tufayli ba’zi maktablarda evakuatsiya amalga oshirilgani haqida avvalroq xabar bergan edi.
Izoh (0)