Qirg‘iziston prezidenti Sadir Japarov budjetdan sotib olingan Airbus H145 vertolyotini sinovdan o‘tkazdi. Bu haqda prezident matbuot xizmati xabar berdi.
Ma’lum qilinishicha, yangi vertolyot Germaniyada respublika budjeti hisobidan xarid qilingan. Aviatexnika allaqachon Qirg‘iziston Favqulodda vaziyatlar vazirligi balansiga o‘tkazilgan.
“Prezident Airbus H145 ni sinovdan o‘tkazar ekan, hozirgi voqelik odamlar xavfsizligini ta'minlash uchun zamonaviy, kuchli uskunalar va vositalarga ega bo‘lish zaruriyatini taqozo qilayotgani, bu esa odamlarning xavfsizligini ta’minlashga yordam berishini aytdi. Yangi texnologiyalardan foydalanish oqibatlarni bartaraf etish, shuningdek, favqulodda vaziyatlarga javob berish vaqtini qisqartirish imkonini beradi”, deyiladi xabarda.
Ta’kidlanishicha, yangi vertolyotdan qirg‘izistonliklar ham tijorat asosida foydalanishlari mumkin. Mablag‘lar davlat budjetiga tushadi. Airbus H145 8 ta yo‘lovchi o‘rindig‘iga mo‘ljallangan bo‘lib, eng yangi navigatsiya uskunalari, avtopilot, TAS 620 yo‘l harakati haqida ogohlantirish tizimlari, havoni qo‘shimcha tozalash va boshqa innovatsiyalar bilan jihozlangan.
Eslatib o‘tamiz, Qirg‘iziston mamlakat Qurolli kuchlari uchun Turkiyadan bir qancha hujumchi dronlar, jumladan Aksungur va Bayraktar sotib olgan. Turkiyaning Bayraktar TB2 hujumchi droni Qirg‘iziston Milliy xavfsizlik davlat qo‘mitasi (GNKB) chegara xizmatiga birinchi marta 2021-yil dekabr oyida olib kelingan.
31-mart kuni mamlakatning Issiqko‘l viloyatida dronlardan foydalangan holda harbiy mashg‘ulotlar o‘tkazilgan. 13-sentabr kuni Qirg‘iziston prezidenti Sadir Japarov GNKB Chegara xizmatining dron bazasini ochgan. Qirg‘iziston KXSHTga a’zo davlatlardan birinchi bo‘lib turk Bayraktar’larini sotib oldi.
Izoh (0)