2024 йилда Қозоғистон армияси 100 дан ортиқ жанговар техника ва самолётларни қабул қилди, деб хабар берди Республика Мудофаа вазирлиги.
Қозоғистон Туркиянинг “Bayraktar” дронларини ҳам олиш ниятида. Аввалига армияни дронлар билан қуроллантириш, кейинроқ эса дронларни Қозоғистонда ишлаб чиқаришни йўлга қўйиш режалаштирилган.
Қозоғистон мудофаа вазири Руслан Жақсилиқов Baykar Defence ишлаб чиқарувчи компанияси бош директори Ҳалук Байракдар билан дронларни етказиб бериш масаласини муҳокама қилди.
Улар Истанбулдаги Sаhа Expo кўргазмасида учрашишди. Қозоғистон ҳарбий делегацияси Туркиянинг “Ҳавелсан” (мудофаа соҳаси учун электрон ускуналар ва дастурий таъминот ишлаб чиқаради), “Аселсан” (ҳаво, қуруқлик ва денгиз кучлари учун маҳсулотлар чиқаради) ҳамда “Трансваро” қурол ишлаб чиқарувчи компаниялари заводларида ҳам бўлди.
Музокаралар натижасида Baykar Қозоғистонга Bayraktar Kalkan, Bayraktar Мini дронлари ва Моsquiti-Х ўқ-дориларини ҳарбий синовлар учун бепул тақдим этиши ҳақида протокол имзоланди. Қанча қурилмалар етказиб берилиши ва қайси вақт оралиғида етказилиши маълум қилинмаган.
Ҳозирги вақтда Қозоғистон армияси Совет Иттифоқининг “Бук-М2Э”, “Тор-М2К” зенит-ракета комплекслари, Беларусиянинг “Роса-РБ”, “Платформа” радиолокацион станциялари, шунингдек, Қозоғистоннинг “Нур” радарлари билан қуролланган.
Ноябрь ойида Қозоғистон президенти Қосим-Жомарт Тўқаев Украинадаги вазият фонида мамлакатдаги муҳим фуқаролик ва ҳарбий объектларни зудлик билан қўриқлашни буюрган эди.
Изоҳ (0)