Qozog‘istonga hujum bo‘lgan taqdirda, mamlakat armiyasi qancha vaqt qarshilik ko‘rsata oladi?

Jurnalistlar Qozog‘iston mudofaa vaziri o‘rinbosari Sulton Kamaletdinovdan mamlakatga hujum bo‘lgan taqdirda, qozoq armiyasi qancha vaqt dosh bera olishini so‘radi. Bu haqda “Zakon.kz” xabar berdi.

Kamaletdinovning so‘zlariga ko‘ra, Qozog‘iston barcha qo‘shni davlatlar bilan do‘st.

“Siz kimni potensial raqib sifatida ko‘rasiz? Mamlakatimiz ko‘p vektorli siyosat olib bormoqda. Qo‘shnilarimiz bilan chegaralarimiz hammasi belgilab qo‘yilgan, imzolangan. Biz qo‘shnilarimizdan hech birini potensial dushman deb hisoblamaymiz. Ular bilan do‘stmiz. Bizda yaxshi qo‘shnichilik munosabatlari o‘rnatilgan”, — degan mudofaa vaziri o‘rinbosari.

Avvalroq Kamaletdinov Ukrainadagi urush fonida Qozog‘iston armiyasida kuzatilgan o‘zgarishlar haqida gapirgandi.

“Bir-biriga o‘xshash qurolli to‘qnashuvlar yo‘q, ularning har biri o‘ziga xos xususiyatlarga ega. Shuning uchun vaziyatni tahlil qilamiz, kuzatamiz, tegishli xulosalar chiqaramiz, jangovar tayyorgarlik dasturiga o‘zgartirishlar kiritamiz”, — degan u.

Shuningdek, Qozog‘iston mudofaa vaziri o‘rinbosari armiyada aynan nima o‘zgarganiga aniqlik kiritdi. 

“Birinchidan, biz puxta tayyorgarlik ko‘rishni, dron operatorlari bilan o‘quv mashg‘ulotlarini o‘tkazishni boshladik. Chunki hozirgi qurolli konflikt dronlar ham razvedkada, ham zarba berishda faol qo‘llanayotganini ko‘rsatadi. Ikkinchisi bu — artilleriya. Raketa artilleriya qo‘shinlaridan foydalanish jangovar tayyorgarlik jarayonida eng keng tarqalgan usulga aylandi”, — deya ta’kidlagan Kamaletdinov.