Prezident Shavkat Mirziyoyev Boku shahrida o‘tayotgan BMTning Iqlim bo‘yicha konferensiyasi doirasida Chexiya bosh vaziri Petr Fiala bilan uchrashuv o‘tkazdi. Bu haqda Prezident matbuot xizmati xabar berdi.
O‘zbekiston—Chexiya munosabatlarini yanada rivojlantirish va ustuvor yo‘nalishlarda amaliy hamkorlikni kengaytirishning dolzarb masalalari muhokama qilindi.
Chexiya anʼanaviy ravishda mamlakatimizning Yevropadagi muhim hamkori hisoblanadi. Keyingi yillarda o‘zaro tovar ayirboshlash hajmi 2 barobar, qo‘shma korxona va loyihalar soni 3 barobar ko‘paydi.
Hukumatlararo komissiya ishini faollashtirish, tovar ayirboshlashni ko‘paytirish bo‘yicha “yo‘l xaritasi” va aniq loyihalardan iborat sanoat kooperatsiyasi dasturini ishlab chiqish zarurligi taʼkidlandi.
Madaniy-gumanitar almashinuvni kengaytirishga alohida eʼtibor qaratildi.
Shavkat Mirziyoyev, shuningdek, Global ekologik fond (GEF) bosh direktori va raisi Karlos Rodriges bilan uchrashuv o‘tkazdi.
Uchrashuvda jamg‘arma bilan O‘zbekistonda iqlim barqarorligi va ekotizimlarni muhofaza qilish borasidagi amaliy hamkorlikni kengaytirishning dolzarb masalalari muhokama qilindi.
GEFning mamlakatimizda bioxilma-xillikni asrash, tabiiy resurslarni boshqarish, iqlim o‘zgarishiga moslashish loyihalarini amalga oshirishdagi muhim hissasi mamnuniyat bilan qayd etildi. Qo‘shma loyihalar portfeli 100 million dollardan oshgan.
Havo sifatini monitoring qilish bo‘yicha mintaqaviy tarmoq yaratish, ko‘kalamzorlashtirish va ekoturizmni rivojlantirish dasturlarini amalga oshirish, yo‘qolib borayotgan hayvon turlarini asrash, shuningdek, Orolbo‘yi hududini qayta tiklash masalalariga alohida eʼtibor qaratildi.
Kelgusi yilda O‘zbekistonda yirik xalqaro tadbirlar, jumladan, Global ekologik fond donorlari yig‘ilishini o‘tkazish yuzasidan ham fikr almashildi.
Bundan tashqari, O‘zbekiston yetakchisi Gretsiya bosh vaziri Kiriakos Mitsotakis bilan uchrashuv o‘tkazdi.
Suhbatda ikki tomonlama hamkorlikni mustahkamlash va amaliy aloqalarni rivojlantirish masalalari, ayniqsa, siyosiy hamda savdo-iqtisodiy sohalardagi munosabatlar muhokama qilindi.
Tovar ayirboshlash hajmini ko‘paytirish choralarini ishlab chiqish, farmatsevtika, elektrotexnika, qishloq xo‘jaligi hamda boshqa sohalarda kooperatsiya loyihalarini shakllantirish muhimligi taʼkidlandi.
Shuningdek, madaniy-gumanitar va sayyohlik yo‘nalishlaridagi almashinuvlarni rivojlantirishga alohida eʼtibor qaratildi.
2025-yilda siyosiy maslahatlashuvlarning navbatdagi davrasini Afinada hamda Iqtisodiy hamkorlik bo‘yicha hukumatlararo komissiya yig‘ilishini Toshkentda o‘tkazishga kelishib olindi.
Shuningdek, xalqaro va mintaqaviy ahamiyatga molik dolzarb masalalar yuzasidan fikr almashildi.
Shavkat Mirziyoyevning Ozarbayjonga tashrifi
Prezident Shavkat Mirziyoyev 12-noyabr kuni Boku shahrida o‘tayotgan BMTning Iqlim o‘zgarishi to‘g‘risidagi hadli konvensiyasi Tomonlari konferensiyasining 29-sessiyasi (COP 29) doirasidagi Jahon yetakchilari sammitining yalpi majlisida nutq so‘zladi. Unda davlat rahbari qator tashabbuslarni ilgari surdi.
Shuningdek, Shavkat Mirziyoyev iqlim bo‘yicha sammit doirasida Yevropa kengashi raisi Sharl Mishel bilan uchrashdi. O‘zbekistonning Yevropa ittifoqi bilan ko‘p qirrali hamkorligini yanada kengaytirish masalalari ko‘rib chiqildi.
O‘zbekiston yetakchisi COP 29 sammiti doirasida Finlyandiya prezidenti Aleksandr Stubb bilan ham uchrashuv o‘tkazdi. Unda 2025-yil yanvar oyida Xelsinki shahrida bo‘lib o‘tadigan Hukumatlararo komissiyaning navbatdagi yig‘ilishi va biznes forumiga puxta tayyorgarlik ko‘rish muhimligi taʼkidlandi.
Shavkat Mirziyoyev hamda Chernogoriya prezidenti Yakov Milatovich o‘rtasidagi uchrashuvda hukumatlararo komissiya tuzish va uning birinchi yig‘ilishini kelgusi yilda Toshkent shahrida biznes forumi bilan birgalikda o‘tkazish taklif etildi.
O‘zbekiston yetakchisi, shuningdek, Yevropa tiklanish va taraqqiyot banki prezidenti Odil Reno-Basso hamda Islom taraqqiyot banki prezidenti Muhammad bin Sulaymon al-Jassir bilan ham muzokaralar o‘tkazdi.
Izoh (0)