Qozog‘iston 2024-yilda Boku—Tbilisi—Jeyhun yo‘nalishi bo‘yicha 1,5 million tonna neft yetkazishni rejalashtirmoqda. Bu haqda mamlakat energetika vaziri Almasadam Satkaliyev xabar berdi.
Qozog‘iston uzoq muddatli istiqbolda eksportni yiliga 20 million tonnagacha oshirishni rejalashtirmoqda, ammo aniq muddatlar hozircha aytilmagan.
O‘rta muddatli istiqbolda neft qazib olishning o‘sishi va yangi dengiz loyihalarini ishga tushirishni hisobga olgan holda, qo‘shimcha tashish yo‘nalishlarini rivojlantirish bo‘yicha ishlar olib borilmoqda. Qozog‘iston neftini yetkazib berish hajmini rivojlantirish va muntazam ravishda oshirishda ham biz, ham ozarbayjonlik hamkorlarimiz manfaatdor, dedi Satkaliyev.
Vazirning aytishicha, Qozog‘iston kelajakda neftni Boku—Supsa (Ozarbayjon—Gruziya) quvuri orqali yetkazib berishni rejalashtirmoqda. Yetkazib berishning taxminiy hajmi yiliga 3 million tonnaga yetishi mumkin, quvurning o‘tkazish qobiliyati 5 million tonnani tashkil etadi. Hozirda ushbu yo‘nalish muhokama va ishlab chiqish bosqichida.
Bundan tashqari, yiliga 20-30 million tonna texnik quvvatga ega bo‘lgan Eskene—Kurik neft quvurini qurish loyihasi ustida ishlanmoqda.
Ma’lum qilinishicha, Boku—Tbilisi—Jeyhun yo‘nalishi bo‘yicha 10 oy ichida 1,2 million tonna Qozog‘iston nefti yetkazib berilgan. Dastlab xomashyo Kaspiy dengizi orqali keyingi tashish uchun Aqtau portiga yuboriladi. Neft eksporti Italiya, Niderlandiya, Fransiya, Gretsiya, Turkiya va boshqa mamlakatlarga amalga oshiriladi.
Qozog‘iston 2024-yilda 68,8 million tonna neft eksport qilishni rejalashtirmoqda (bu umumiy qazib olish hajmining 78 foizini tashkil etib, jami 88,4 million tonnaga yetadi).
Yetkazib berishning asosiy qismi (55,4 million tonna) Kaspiy quvurlari konsorsiumi orqali amalga oshirilishi ko‘zda tutilgan. Atirau—Samara yo‘nalishida 8,6 million tonna, Xitoyga 1,1 million tonna, Aqtau portiga 3,6 million tonna neft eksport qilish kutilmoqda.
Izoh (0)