Qirg‘izistonning Air Manas aviakompaniyasi uzoq tanaffusdan so‘ng Bishkek—Toshkent—Bishkek yo‘nalishi bo‘yicha ilk parvozni amalga oshirdi, deb xabar bermoqda Uzbekistan Airports matbuot xizmati.
Ma’lum qilinishicha, 4-mart kuni mahalliy vaqt bilan soat 10:05 da ushbu aviakompaniya samolyoti Toshkent aeroportiga qo‘ndi. An’anaga ko‘ra, samolyot suv arkasi bilan tantanali ravishda kutib olindi. Soat 11:15 da samolyot bortida 144 nafar yo‘lovchi bilan Toshkent —Bishkek yo‘nalishi bo‘yicha jo‘nab ketdi.
Mart oyi davomida parvozlar dushanba va juma kunlari charter asosida amalga oshiriladi. Yozgi jadvalga o‘tish munosabati bilan Air Manas aviakompaniyasi Bishkek—Toshkent—Bishkek yo‘nalishi bo‘yicha muntazam qatnovlarga o‘tishga umid qilmoqda.
Ma’lumot uchun, aviatashuvchi O‘zbekistonga deyarli ikki yil davomida parvoz qilmagan — 2020-yilda pandemiya sababli parvozlar to‘xtatilgan edi.
Bundan avval Rossiyaning S7 Airlines kompaniyasi O‘zbekistonga barcha reyslarni may oyigacha bekor qilgani haqida xabar berilgan edi.
Izoh (0)