Oliy Majlis Senati raisi Tanzila Norboyeva Boku shahrida BMTning Iqlim o‘zgarishi bo‘yicha konferensiyasi (COP29) doirasida xalqaro tashkilotlar rahbarlari hamda parlament rahbarlari bilan ikki tomonlama uchrashuvlar o‘tkazdi. Bu haqda Senat matbuot xizmati xabar berdi.
Jumladan, Senat raisi Parlamentlararo ittifoq raisi Tuliya Ekson hamda Parlamentlararo ittifoq bosh kotibi Martin Chungong bilan uchrashuv o‘tkazdi.
Muloqot davomida tomonlar O‘zbekistonning Parlamentlararo ittifoq bilan doimiy hamkorligi, kelgusidagi rejalar, 2025-yilning aprel oyida Toshkent shahrida o‘tkaziladigan 150-yubiley Assambleyaga tayyorgarlik ko‘rish, Barqaror rivojlanish maqsadlari bajarilishida parlament nazorati o‘rnatilganligi, bu borada maxsus komissiyaning samarali faoliyati kabi masalalar atroflicha muhokama qilindi.
Shu bilan birga mamlakatda ijtimoiy himoya tizimini yaratish, kambag‘allikni qisqartirish, inklyuziv va kreativ iqtisodiyotni rivojlantirishda parlamentning roli xususida fikr almashildi.
Shuningdek, Tanzila Norboyeva Ozarbayjon Milliy Mejlisi raisi Sohiba Gafarova bilan uchrashdi.
Muloqot davomida O‘zbekiston va Ozarbayjon parlamentlari o‘rtasidagi o‘zaro hamkorlik aloqalarini amaldagi holati, istiqboldagi rejalar va vazifalar muhokama qilindi.
Jumladan, ikki mamlakat o‘rtasida ekologiya va iqlim bo‘yicha parlament hamkorligini yanada mustahkamlash, bu borada o‘zaro tajriba almashish masalalariga eʼtibor qaratildi.
Izoh (1)
Ишқилиб буларгаям отработаем девормадимикин?