Jahon banki Tojikistonda Rog‘un gidroelektr stansiyasi (GES) megaloyihasi qurilishini yakunlash uchun Xalqaro taraqqiyot assotsiatsiyasi (XTA) 350 million dollar miqdoridagi grantini ma’qulladi.
Stansiya Dushanbedan 110 kilometr sharqda barpo etilmoqda. Loyiha hujjatlariga ko‘ra, uning o‘rnatilish quvvati 3,6 ming megavattni tashkil etadi. Rog‘un GES — bu hukumat tomonidan Markaziy va Janubiy Osiyo mamlakatlariga energiya mustaqilligiga erishish hamda arzon elektr energiyasini eksport qilish uchun mo‘ljallangan obyekt.
Rog‘un GESda ishlab chiqariladigan elektr energiyasining taxminan 70 foizi Qozog‘iston va O‘zbekistonga arzon narxlarda eksport qilinadi.
Tojikiston hukumati qurilish davrida kambag‘allarni ijtimoiy qo‘llab-quvvatlash va ijtimoiy himoya tizimini kengaytirish uchun umummilliy foyda taqsimoti dasturiga daromadning 3 foizini ajratish majburiyatini oldi. Bu ko‘rsatkich qurilish yakunlanganidan so‘ng 5 foizgacha oshadi.
GES qurilishini yakunlash uchun taxminan 6,3 milliard dollar talab etiladi. Bu mablag‘ loyiha daromadlari, ichki manbalar va rivojlanish bo‘yicha hamkorlar hisobidan moliyalashtiriladi.
Rog‘un GESga yo‘naltirilgan ushbu sarmoyalar Jahon banki, Osiyo taraqqiyot banki (OTB), Osiyo infratuzilma investitsiyalar banki (OIIB), Yevropa tiklanish va taraqqiyot banki (YTTB), Yevropa investitsiya banki (YIB), Yevropa Ittifoqi (YI), Islom taraqqiyot banki (ITB), OPEK xalqaro taraqqiyot jamg‘armasi, Saudiya jamg‘armasi, Abu-Dabi jamg‘armasi, Quvayt jamg‘armasi va boshqa ehtimoliy hamkorlardan grantlar hamda imtiyozli mablag‘lar ko‘rinishida deyarli 3 milliard dollar jalb etishga yordam beradi.
Rog‘un GESda ishlab chiqarilgan elektr energiyasi mamlakatning umumiy energetika tizimiga uzatiladi. 2018 va 2019-yillarda ishga tushirilgan ikkita agregat 80 dan 120 megavattgacha elektr energiyasi ishlab chiqarmoqda.
Tojikiston Energetika va suv xo‘jaligi vazirligi ma’lumotlariga ko‘ra, 2018-yil oxiridan 2023-yil avgustigacha bo‘lgan davrda stansiyaning ikkita turbinasi jami 6 milliard kilovatt-soat elektr energiyasi ishlab chiqargan.
Stansiyada har birining quvvati 600 megavatt bo‘lgan jami oltita agregat o‘rnatiladi, GESning o‘rnatilish quvvati 3.600 megavattni tashkil etib, yillik o‘rtacha ishlab chiqarish hajmi 17 milliard kilovatt-soatga yetadi. Yangilangan qurilish rejasiga ko‘ra, inshootni to‘liq foydalanishga topshirish 2042-yilgacha rejalashtirilgan.
Izoh (0)