Tojikiston hukumati Jahon banki bilan Rog‘un gidro elektr stansiyasi (GES) qurilishini yakunlash uchun 650 million dollar miqdorida grant kelishuvi ajratish bo‘yicha muzokaralarni yakunlamoqda. Bu haqda Emomali Rahmon elektr stansiyasi quruvchilari bilan uchrashuvda ma’lum qildi.
Osiyo infratuzilma investitsiya banki (OIBB) bilan 500 million dollar miqdorida kredit shartnomasini imzolash bo‘yicha muzokaralar ham yakuniy bosqichda.
Shuningdek, boshqa arab taraqqiyot fondlari, jumladan OPEK Xalqaro taraqqiyot fondi, Quvayt taraqqiyot fondi, Abu-Dabi fondi va Italiyaning Jamg‘arma-trast fondi tomonidan ham 100 million dollar ajratish to‘g‘risidagi qarorlar qabul qilingandi, dedi Rahmon.
U Islom taraqqiyot banki bilan 150 million dollar va Saudiya taraqqiyot jamg‘armasi bilan 100 million dollar miqdorida imtiyozli kreditlash shartnomalari imzolanganini eslatdi. Osiyo taraqqiyot bankining grant mablag‘larini, Yevropa investitsiya banki va Qatar jamg‘armasining imtiyozli kreditlarini jalb qilish bo‘yicha ishlar olib borilmoqda.
Tojikiston hukumati 2008-2024-yillarda GES qurilishini yakunlashga davlat byudjeti va boshqa manbalardan 42,5 milliard somoniydan ortiq mablag‘ yo‘naltirgan.
Emomali Rahmon “Rog‘un” taqdiriy ahamiyatga ega obyekt deb e’lon qilinganini aytdi.
Chunki GES Tojikistonning energetik mustaqilligiga erishish, mamlakatning barqaror iqtisodiy rivojlanishi, xalqning turmush darajasi va sifatini yuksaltirish, Vatanni obod qilish uchun mustahkam poydevor yaratmoqda, dedi u.
Uning so‘zlariga ko‘ra, stansiyaning dastlabki ikkita agregati orqali 2018-yildan bugungi kungacha 7,5 milliard kilovatt-soat elektr energiyasi ishlab chiqarilgan.
Hozirgi kunda gidroelektr stansiyasi qurilishida 17 mingdan ortiq ishchi va muhandis-texnik xodimlar mehnat qilmoqda, ularning soni 2023-yilga nisbatan 3 ming kishiga oshgan.
Izoh (0)