Tojikistonda Rog‘un gidro elektr stansiyasini (GES) qurish loyihasini moliyalashtirishga tayyorgarlik ko‘rishda Jahon bankining ekologik va ijtimoiy standartlariga rioya etilmagani aniqlandi. “Chegara bilmas daryolar” xalqaro ekologik koalitsiyasi “Rog‘un GES loyihasi: Jahon banki talablariga muvofiqlik bo‘yicha hisobot” nomli hujjatni e’lon qildi.
Ekologlar bankning oltita muhim standartlari buzilganini aniqladi: ekologik baholashning umumiy qoidalari, biologik xilma-xillikni saqlash, resurslardan samarali foydalanish, to‘g‘onlar xavfsizligi, jamoatchilik ishtiroki va majburiy ko‘chirish. Shuningdek, investitsion loyihalarni moliyalashtirishda bankning ekologik va ijtimoiy siyosatiga rioya qilinmagan.
Vaziyatni og‘irlashtirayotgan omil shuki, Jahon banki Rog‘un GES loyihasi uchun barcha moliyalashtiruvchi tashkilotlar (Osiyo infratuzilmaviy investitsiyalar banki, Osiyo taraqqiyot banki, Yevropa investitsiya banki va boshqalar) nomidan ekologik va ijtimoiy kafolatlarni ishlab chiqish mas’uliyatini o‘z zimmasiga olgan.
Bunday yondashuvga rozi bo‘lgan boshqa moliyaviy tashkilotlar shu orqali Jahon banki standartlarini o‘zlarining standartlariga teng deb tan olgan. Agar bu standartlar buzilsa, loyihada ishtirok etayotgan o‘nlab boshqa moliyaviy tashkilotlarning standartlari ham buzilgan hisoblanadi.
Ishonchimiz komilki, Rog‘un GES loyihasining taqdim etilgan varianti Jahon bankining ijtimoiy-ekologik tamoyillariga mos kelmaydi va xalqaro taraqqiyot banklari tomonidan joriy ko‘rinishda moliyalashtirilmasligi kerak. Bank standartlari va protseduralariga rioya qilinmagani tufayli loyiha ko‘plab samarasiz va xavfli elementlarni o‘z ichiga oladi, bu esa uni amalga oshirish jarayonida jiddiy ekologik va ijtimoiy zarar yetkazishi mumkin, deydi “Chegara bilmas daryolar” koalitsiyasi koordinatori Yevgeniy Simonov.
Rog‘un GES loyihasida ishtirok etishni rejalashtirgan barcha xalqaro taraqqiyot banklariga tegishli hujjat yuborilgan va Jahon banki rahbariyatiga yirik to‘g‘onlar (shu jumladan Rog‘un GES) qurilishini moliyalashtirish xavflari bo‘yicha ochiq xat taqdim etilgan. Unga dunyoning turli mamlakatlaridan 124 ta jamoat tashkilotlari, shu jumladan “Chegara bilmas daryolar” ekologik koalitsiyasi imzo chekkan.
Izoh (0)