Farg‘ona va Andijon viloyatlarida suyultirilgan gaz va gaz ballonlarini talon-toroj qilish holatlari fosh etildi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Jumladan, “Oltiariqtumangaz” gaz taʼminoti bo‘limi masʼul shaxslari 153 ta aholi xonadoniga go‘yoki 2 998 ta gaz ballonlarida 1 kg uchun belgilangan 1 600 so‘mdan jami 58 520 kg suyultirilgan gaz yetkazib berilgani haqida elektron dasturga soxta maʼlumotlar kiritgan.
Amalda esa gaz to‘ldirilgan ballonlarni qimmat narxlarda boshqa shaxslarga sotib yuborib, jami 262 million 4 ming so‘m naqd pulni talon-toroj qilgan.
Shuningdek, “Buloqboshitumangaz” gaz taʼminoti bo‘limi masʼul shaxslari o‘zlarining moddiy javobgarligida bo‘lgan umumiy bahosi 98 mln so‘mlik jami 235 dona suyultirilgan gaz ballonlarini hech qanday hujjatsiz boshqa shaxslarga berib yuborgan.
Holatlar yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) bilan jinoyat ishlari qo‘zg‘atilib, tergov harakatlari o‘tkazilmoqda.
Noqonuniy tarzda saqlangan maishiy gaz ballonlari
Avvalroq Andijonda jami 212 ta suyultirilgan gaz ballonlarini noqonuniy ravishda saqlagan xonadonlar aniqlangandi.
Izoh (0)