Dunyoning eng boy odami Ilon Mask Apple kompaniyasining App Store ilovasidan norozi bo‘lmoqda. Mask App Store monopoliyaga qarshi kurash to‘g‘risidagi qonunlarni buzmoqda, degan fikrda. Bu haqda Reuters agentligi xabar berdi.
Milliarder Ilon Mask xAI kompaniyasiga ham asos solgan. Kompaniya o‘zining Grok nomli sun’iy intellekt ilovasini App Store’ga joylashtirgan.
Ilon iddaosiga ko‘ra, OpenAI bilan hamkorlikka ega Apple ChatGPT’dan boshqa sun’iy intellekt kompaniyalarining ilovalarini birinchi o‘ringa qo‘ymaslikka harakat qilmoqda.
“Apple OpenAI’dan boshqa hech bir sun’iy intellekt kompaniyasining App Store’da 1-o‘ringa chiqishiga yo‘l qo‘ymaslikka urinayotgandek harakat qilmoqda. Bu esa aniq monopoliyaga qarshi qonun buzilishidir. xAI darhol huquqiy choralar ko‘radi”, degan Mask o‘zining X (Twitter) ijtimoiy tarmog‘idagi postida.
Qayd etilishicha, Ilon Mask Apple’ning OpenAI’ga yon bosayotgani haqidagi iddaolariga dalil keltirmagan. Apple va OpenAI bu boradagi savollarga javob bermagan.
Ayni vaqtda ChatGPT App Store’da birinchi raqamli bepul ilova bo‘lib turibdi. xAI’ning Grok ilovasi beshinchi o‘rinda joylashgan. Google’ning Gemini chatboti atigi 57-o‘rinda qayd etilgan. ChatGPT Google Play Store’da ham eng ommabop ilova bo‘lib turibdi.
Ta’kidlanishicha, Apple OpenAI bilan hamkorlikka ega bo‘lib, ChatGPT’ni iPhone, iPad va Mac’larga integratsiya qilgan.
“Hey, Apple App Store! X dunyodagi birinchi raqamli yangiliklar ilovasi hisoblanadi. Grok esa sun’iy intellekt dasturlari bo‘yicha 5-o‘rinda turgan bo‘lsa-da, nega ularni ‘Eng zarur ilovalar’ bo‘limiga joylashtirmaysiz? Siyosat bilan o‘ynashyapsizmi?”, degan Mask.
Maskning bunday bayonotlari Apple’ga raqobatni cheklash borasida noroziliklar kuchayib borayotgan bir paytda yangradi. Kompaniyaga AQSHning o‘zida raqobatni cheklash doirasida bir qancha ishlar ochilgan. Shuningdek, Yevropa Ittifoqining monopoliyaga qarshi kurash bo‘yicha tashkilotlari 2025-yilning aprel oyida Apple’ni 587 million dollar jarimaga tortgan edi.
Izoh (0)