2,5 milliard yildan so‘ng Somon yo‘li eng yaqin yirik galaktika — Andromeda, shuningdek, ularning mitti yo‘ldoshlari bilan to‘qnashadi. Avstraliyalik astronomlar qo‘shilish jarayonida taxminan 3 milliard yil oldinda bo‘lgan bir juft spiral galaktikani o‘rganib, nima kutilayotganini aniqlashgan. Tadqiqot natijalari Monthly Notices of the Royal Astronomical Society (MNRAS) jurnalida e’lon qilindi.
Kvinslend universiteti professori Sara Suit rahbarligidagi guruh Delegate loyihasi doirasida NGC 5713 va NGC 5719 galaktikalarini kuzatgan. Bu galaktikalar allaqachon bir-biri va atrofida aylanayotgan yo‘ldoshlari bilan “kosmik raqs”ga tushgan. Olimlarning fikricha, bunday o‘zaro ta’sirlar mitti galaktikalarni tartibsiz bulut o‘rniga Somon yo‘li va Andromeda kabi muntazam tekisliklarda joylashishiga yordam beradi.
“Bu, ehtimol, galaktikamizning yo‘ldoshlar tizimiga o‘xshash tuzilmalar qanday shakllanishi va kelajakda ularning qanday o‘zgarishi haqidagi eng aniq tasavvurdir”, dedi Suit.
Ushbu tadqiqot galaktikalar evolyutsiyasi, qorong‘i materiyaning taqsimlanishi va koinotning keng miqyosdagi tuzilishini aniqroq modellashtirish imkonini beradi. Bundan tashqari, u Somon yo‘li va Andromeda tarixining qanchalik noyobligi yoki bu koinot uchun odatiy hodisa ekanini ko‘rsatadi.
Bundan avval 2032-yilda asteroid Oy bilan to‘qnashib, Yer orbitasidagi sun’iy yo‘ldoshlarni shikastlashi mumkinligi xabar qilingandi.
Iyul oyi oxirlarida Amsterdam universiteti astronomlari g‘ayrioddiy TOI-2431 b ekzosayyorasini kashf etishgani ma’lum qilingandi. Bu sayyorada bir yil atigi 5,4 Yer soatida “o‘tib ketadi”. U Yerdan bor-yo‘g‘i 117 yorug‘lik yili uzoqlikda joylashgan.
Izoh (0)