Damashq chekkasida Isroil havo hujumi oqibatida yuqori martabali eronlik general Sayid Roziy Musaviy halok bo‘ldi. Bu haqda Insider xabar berdi.
Eron rasmiylari va mintaqadagi ittifoqchi guruhlar qotillik uchun qasos olishga va’da berdi.
“Bu sionistik rejimning mintaqadagi hafsalasi pir bo‘lgani va zaifligidan dalolat beradi, buning uchun u albatta og‘ir tovon to‘laydi”, — dedi Eron prezidenti Ibrohim Raisiy.
Marhum Eronning Suriyadagi harbiylashtirilgan Inqilobiy gvardiyasining uzoq yillik maslahatchisi bo‘lgan. Uning o‘limi Isroil va HAMAS o‘rtasidagi urush mintaqaviy oqibatlarga olib kelishi mumkinligi haqidagi xavotirlar fonida sodir bo‘ldi.
“Isroil harbiylari Isroilning xavfsizlik manfaatlarini himoya qilish vazifasini bajaragani aniq”, — dedi Isroil armiyasi vakili kontr-admiral Daniel Hagari va bu xabarga izoh bermasligini aytdi.
Eron davlat televideniyesi Musaviyning o‘limi haqida xabar berish uchun translyatsiyani to‘xtatdi. Musaviy Suriya prezidenti Bashar al-Asad rejimiga qarshilarga kurashda Iroq, Afg‘oniston va Pokistondan jangchilarni tayyorlash uchun Suriyaga yuzlab Inqilobiy gvardiya a’zolarini yuborgan, Suriya va Eron o‘rtasidagi harbiy ittifoqni muvofiqlashtirishga rahbarlik qilgan.
Eron davlat matbuoti Musaviyni 2020-yil yanvarida AQSHning Iroqda dron hujumi oqibatida halok bo‘lgan Eronning “Quds” elita qo‘shinlari boshlig‘i general Qosim Sulaymoniyning yaqin ittifoqchisi deb ta’riflagan. Isroilning shu oy boshida Suriyadagi zarbalari oqibatida yana ikki general halok bo‘ldi.
25-dekabr kuni Isroil shia musulmonlari ziyoratgohi yaqinida joylashgan Sayyida Zaynab rayoniga zarba berdi. Eron prezidenti Ibrohim Raisiy o‘z bayonotida “Musaviy qarshilik frontida maslahatchi bo‘lib, Suriyadagi muqaddas qadamjolarni himoya qilib, islomiy g‘oyalarni himoya qilgan chog‘ida shahid bo‘lganini” aytdi.
Eronning Suriyadagi elchisi Husayn Akbariy qotillikni qoralab, Musaviy Suriyada rasmiy harbiy maslahatchi bo‘lganini bildirdi.
“Isroil bu jinoyatga o‘z vaqtida va to‘g‘ri vaziyatda javobni albatta oladi”, — dedi Damashqdan gapirgan Akbariy.
Suriya Inson huquqlari observatoriyasining bildirishicha, Musaviy “Hizbulloh”ning bir necha idoralaridan biri ekani aytilgan fermaga kirganidan keyin hujumga uchragan.
Izoh (0)