Finlyandiya Rossiya chegarasiga yaqin joyda 2,8 ming harbiy xizmatchi ishtirokida quruqlikdagi mashg‘ulotlarni boshladi.
“Report” xabariga ko‘ra, mashg‘ulotlar 30-noyabrdan 4-dekabrga qadar Kajaani va Kuhmo shaharlaridagi Vuosanka va Sotinpuro poligonlarida bo‘lib o‘tadi.
Manyovrlarda 600 ta transport va jangovar harbiy texnika, NH90 transport vertolyoti va MD 500 yengil vertolyotidan foydalaniladi.
Harbiylar hujumga va mudofaaga tayyorgarlik ko'rish, yaqinlashib kelayotgan dushmanni yo'q qilish, shuningdek, tunda jang qilish va qish sharoitida jangovar harakatlar olib borishni mashq qiladilar.
Bungacha ERR teleradiokompaniyasi dekabr oyining birinchi yarmida Shimoliy Atlantika alyansi (NATO) davlatlari ishtirokida Estoniyada “Chaqmoq” (Picne) harbiy mashg‘ulotlarini o‘tkazish rejalashtirilgani haqida xabar bergan edi.
Avvalroq Finlyandiya ayollarni Rossiyaga qarshi urushga tayyorlayotgani xabar berilgandi.
Ma’lum qilinishicha, ayollarga birinchi tibbiy yordam ko‘rsatish, gulxan yoqish, ochiq havoda ovqat pishirish va chodirlar o‘rnatish o‘rgatilmoqda. Ular kiberxavfsizlik, ruhiy barqarorlik, yovvoyi tabiatda omon qolish ko‘nikmalari bo‘yicha ham bilim olmoqda. Shunday ayollar guruhlaridan biri Finlyandiyaning sharqidagi harbiy bazada ta’lim o‘tamoqda.
Ayollarni favqulodda vaziyatlarga tayyorlovchi kurs Nasta deb nomlanadi, u 1997-yildan beri faoliyat yuritib kelmoqda. U qisman Finlyandiya Mudofaa vazirligi tomonidan moliyalashtiriladi va Milliy mudofaani o‘qitish assotsiatsiyasidan katta yordam oladi. Nasta taxminan 100 ming a’zoga ega. Rossiyaning Ukrainaga keng ko‘lamli hujumi boshlangan 2022-yil 24-fevralda kursga qiziqish misli ko‘rilmagan darajada oshgan.
Izoh (0)