AQSH prezidenti Jo Bayden administratsiyasi Ukrainaga 725 million dollarlik harbiy yordam paketini tayyorlamoqda. Bu haqda amerikalik ikki amaldorga tayanib, Reuters xabar berdi.
Reja bilan tanish bo‘lganlarga ko‘ra, ushbu paketga Bayden o‘tgan hafta jo‘natishni ma’qullagan yerusti minalari ham kiradi. Shuningdek harbiy yordam quyidagilarni o‘z ichiga olishi kutilmoqda:
- HIMARS yalpi o‘t ochish reaktiv tizimi uchun o‘q-dorilar;
- Stinger raketalari;
- boshqariladigan uzoq masofaga uchuvchi GLMRS raketalari tarkibiga kiruvchi kassetali o‘q-dorilar;
- dronlar
AQSH prezidenti administratsiyasi 2-dekabr kuni Kongressni ushbu paket haqida rasman xabardor qilishi mumkin. Bayden hali hujjatga imzo chekmagan, shuning uchun yordamning mazmuni va miqdori o‘zgarishi inkor etilmaydi.
The Wall Street Journal’ning Pentagondagi manbasiga ko‘ra, vazirlik qolgan vaqt ichida Kiyevga oyiga 500-750 million dollarlik qurol-yarog‘ yubormoqda. Bu so‘nggi davrdagi o‘rtacha ko‘rsatkichdan yuqori.
Shu hafta Bayden ma’muriyati Kongressdan Ukraina uchun qurol-yarog‘ga qo‘shimcha 24 milliard dollar ajratishni so‘radi. Buning 8 milliard dollari Ukraina uchun uzoq muddatli qurol-yarog‘ yetkazib berish shartnomalari uchun, qolgan 16 milliardi esa Pentagon zaxiralarini to‘ldirishga yo‘naltiriladi.
AQSH harbiy yordamiga Rossiyaning pozitsiyasi
Rossiya Ukrainaga qurol-yarog‘ yetkazib berishni muammoni hal etishga to‘sqinlik qilishi, NATO davlatlarini to‘g‘ridan-to‘g‘ri mojaroga jalb etishi va “olov bilan o‘ynashish” deb hisoblaydi. Rossiya tashqi ishlar vaziri Sergey Lavrov Ukraina uchun qurol-yarog‘ tashiyotgan har qanday yuk Rossiya uchun qonuniy nishonga aylanishini ta’kidlagan.
Uning so‘zlariga ko‘ra, AQSH va NATO nafaqat qurol yetkazib berish, balki Buyuk Britaniya, Germaniya, Italiya va boshqa davlatlar hududida kadrlar tayyorlash orqali ham mojaroda bevosita ishtirok etmoqda. Kreml esa G‘arbning Ukrainani qurol bilan ta’minlashi salbiy oqibatlarga olib kelishini bildirgan.
Rossiya tahdidli bayonotlariga qaramay, o‘zi ham Shimoliy Koreya harbiylarini urushga jalb qilmoqda, jang maydonida Eronning Shahed dronlaridan foydalanmoqda.
Izoh (0)