Buxoro viloyati hokimining yoshlar siyosati, ijtimoiy rivojlantirish va maʼnaviy-maʼrifiy ishlar bo‘yicha o‘rinbosari Mirali Hamroyev o‘z arizasiga ko‘ra lavozimidan ozod qilindi. Bu haqda viloyat hokimligi matbuot xizmati xabar berdi.
Uning o‘rnini Baxtiyor Adilov egalladi.
Adilov 1986-yil 22-iyunda Buxoro shahrida tug‘ilgan. 2008-yilda Buxoro davlat universitetini bitirgan. Maʼlumoti bo‘yicha mutaxassisligi — iqtisodchi.
Ayni paytga qadar u Buxoro viloyati Iqtisodiyot va moliya bosh boshqarmasi boshlig‘i vazifasida ishlab kelayotgan edi.
Avvalroq Buxoro viloyatining Peshku, Vobkent, Qorovulbozor tumanlari hamda Kogon shahrida hokimlar o‘zgargani haqida xabar berilgandi.
29-noyabr kuni prezident Shavkat Mirziyoyev Buxoro viloyatida qo‘shimcha imkoniyatlarni yuzaga chiqarish, investitsiya va ish o‘rinlarini ko‘paytirish chora-tadbirlari bo‘yicha yig‘ilish o‘tkazgan edi. Unda Buxoroda hokimlar, ularning o‘rinbosarlari va sektor rahbarlari 6 oy favqulodda ish tartibiga o‘tishi belgilangandi.
Izoh (0)