Turkiya yaqinda imzolangan mudofaa shartnomasi doirasida Suriyani qurol-yarog‘, harbiy texnika hamda moddiy-texnik yordam bilan ta’minlaydi. Bu haqda Turkiya Mudofaa vazirligi vakillariga tayanib, Euronews xabar berdi.
Bir necha kun avval Turkiya mudofaa vaziri Yashar Gyuler va Suriya mudofaa vaziri Murhaf Abu Qasr harbiy tayyorgarlik bo‘yicha o‘zaro anglashuv memorandumini imzoladi. Ushbu hujjat Turkiyaning Suriya hukumatini qo‘llab-quvvatlashini yanada kuchaytirishi kutilmoqda.
Iyul oyida Isroilning mamlakat ichki ishlariga aralashuvi ortidan Suriya Turkiyaga murojaat qilib, mudofaa qobiliyatini mustahkamlashda yordam so‘ragandi. Turkiya Mudofaa vazirligiga ko‘ra, kelishuv doirasida Turkiya o‘z “bilim va tajribasi” bilan o‘rtoqlashadi.Shuningdek, harbiy uskunalar, qurol-yarog‘ tizimlari va boshqa zarur materiallarni yetkazib beradi.
So‘nggi paytlarda Suriya janubidagi Suvayda viloyatida hukumat qo‘shinlari va mahalliy badaviy qabilalar bir tomonda, ozchilik druzlar esa ikkinchi tomonda bo‘lgan to‘qnashuvlarda yuzlab odamlar halok bo‘ldi. Turkiya Suriyaning yangi ma’muriyatini qo‘llab-quvvatlashini bildirdi.
13-avgust kuni Turkiya tashqi ishlar vaziri Hoqon Fidan Isroil va kurd jangarilarini Suriya barqarorligiga tahdid soluvchi harakatlarni to‘xtatishga chaqirdi. U, shuningdek, ularni mamlakatni tiklash bo‘yicha sa’y-harakatlarga putur yetkazishda aybladi.
Izoh (0)