“Daryo” Yashnobod tumani bo‘ylab materiallar turkumini davom ettiradi. Bugungi qahramonimiz “Aviasozlar” bozorida salkam 30 yildan ortiq vaqt mobaynida savdogarlik qilayotgan Nargiza Qambarova.
Men Qambarova Nargiza Hamidovna, 1985-yilda tug‘ilganman. Yashnobod tumanidagi 226-maktabni bitirganman. Ota-onamning imkoniyati chegaralanganligi sababli maktab ta’limidan keyingi bosqichlarni davom ettira olmadim. Bosh farzand bo‘lganim uchun ularning hunarini tutib, savdo-sotiq bilan shug‘ullanishga qaror qilganman.
Hozirda “Aviasozlar” bozorida ho‘l mevalar savdosi bilan shug‘ullanaman. Bu yerda mehnat qilayotganimga mana salkam 30-35 yil bo‘ldi. Turmush o‘rtog‘im va to‘rt nafar farzandim bor. Farzandlarim 15, 9, 3, va 1,5 yoshda. Faqat mehnat va ish orqali oilamizni boqamiz. Ba’zan farzandlarim “Oyi, ishga chiqmasangiz-chi”, deyishadi. Lekin ishlamasam, ro‘zg‘orni tebratib bo‘larmidi.
Bir kunlik foyda miqdorini aniq ayta olmayman. Sababi bozorda har kuni barqaror foyda topish juda mushkul. Ba’zan savdo bor, boshqa safar yo‘q. Masalan, 20-30 million so‘mlik mahsulot olib kelsangiz, undan 1,5-2 million foyda qoladi. Kecha, masalan, 1,5 million so‘m foyda qildim. Lekin bu ertaga ham xuddi shuncha daromad topaman, degani emas.
Savdoning eng qiziq tomoni — xaridor kelganida. Agar xaridor bo‘lmasa va mehnat natijasiz qolsa, ishning zavqi yo‘qoladi. Savdo yo‘q bo‘lganda telefon bilan ovunib, kechga tomon uyga ketamiz. Xaridorlarni esa faqat shirin so‘z bilan jalb qilish mumkin. Xushmuomala bo‘lmasangiz, ular boshqa kelmaydi. Biz hatto sayyohlar bilan ham ishlaymiz, shuning uchun tarbiya va halollik juda muhim. Faoliyatini edi boshlayotgan savdogarlarga doim muomala, tarbiya, va madaniyat muhim ekanligini uqtiraman. Hayot va bozor meni shular orqali tarbiyaladi.
Mavsumiy mahsulotlar juda yaxshi sotiladi. Men savdo uchun eng zo‘r, deb bilgan bahorda o‘rik va rovoch xaridorgir, masalan. Olma va nok esa tez buzilmasligi bilan foydali. Faqat qishda sovuq tufayli qiynalamiz. Mevalarimiz muzlab qolmasligi uchun ularni yaxshilab o‘raymiz yoki kameraga olib kiramiz.
Bo‘sh vaqtimning katta qismini bolalarimga bag‘ishlayman. Ular bilan dars qilamiz, suhbatlashamiz va birga ovqat pishiramiz. Kelajakda farzandlarim shifokor, advokat kabi katta-katta kasblarni egallashini xohlayman. O‘zim yetmagan orzularim ro‘yobini ularda ko‘rmoqchiman.
Agar sayohat qilish imkoniyati bo‘lsa, avvalo, Samarqand, Buxoro, Xorazm kabi tarixiy shaharlarimizni aylanib chiqmoqchiman. Ana undan keyin xorijiy sayohatlarni o‘ylash mumkin.
Izoh (0)