Samarqand shahrida tadbirkorning 6,4 mlrd so‘m mablag‘ini qimor o‘yinlariga yutqazgan hisobchi aniqlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Maʼlum qilinishicha, “Ph.l.” MCHJda hisobchi lavozimida ishlagan B.M. bank elektron kalitlaridan foydalanib, MCHJning 6,4 mlrd so‘m mablag‘ini soxta maʼlumotlarni rasmiylashtirish orqali o‘zining nomiga ochilgan plastik kartalarga o‘tkazib olgan.
So‘ng ushbu mablag‘larni internetdagi qimor o‘yinlarida yutqazib qo‘ygan.
Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilib, tergov harakatlari o‘tkazilmoqda.
Totalizator o‘ynab, yutqazilgan millionlar
Avvalroq Sirdaryoda 14 yoshli bola otasining salkam 4 mln so‘mini o‘g‘irlab, onlayn o‘yinga sarflagani ma’lum bo‘lgandi. Shuningdek, Nukusda 9,2 mlrd so‘m pulni qimorda yutqazgan bank xodimi 8 yilga qamalgani, Farg‘onada bukmekerlik bilan shug‘ullangan shaxsga jinoyat ishi qo‘zg‘atilgani to‘g‘risida xabar berilgandi.
Buxoroda totalizatorda salkam 100 million so‘m miqdorda pul yutqazgan shaxs o‘z yashash xonadonidagi seyfdan pullarni o‘g‘irlab, jinoyati izini yashirish maqsadida seyfni yoqib yuborgandi. Samarqandda 631 million so‘mni o‘zlashtirib, qimorda yutqazib qo‘ygan “Xalq banki” filiali xodimi jazolangandi.
Bundan tashqari, Buxoro viloyatining Shofirkon tumanida o‘zgalar nomiga kredit olib, onlayn qimorga sarflab yuborgan 16 yoshli bolaga nisbatan jinoyat ishi qo‘zg‘atilgandi.
Izoh (0)