O‘zbekistondagi 94 ta osh tuzi ishlab chiqaruvchi, sotuvchi va undan foydalanuvchi korxonaning bor-yo‘g‘i 24 tasida laboratoriyalar bor. Bu haqda 29-noyabr kuni Senatda o‘tkazilgan qo‘mitalarning qo‘shma majlisida ma’lum qilindi.
Unda mazkur qo‘mitalar hamkorligida o‘tkazilgan “Yod yetishmasligi kasalliklari profilaktikasi to‘g‘risida”gi qonunning yodlangan tuz va yodlangan oziq-ovqat mahsulotlarini ishlab chiqarish hamda qayta ishlashda xo‘jalik yurituvchi subyektlar tomonidan standartlarning majburiy talablariga rioya etilishi ustidan davlat nazoratini amalga oshirishga oid qismi ijrosini o‘rganish natijalari muhokama qilindi.
O‘zbekiston yod tanqisligi bo‘yicha og‘ir hudud bo‘lib qolmoqda. Masalan, 2023-yilda yod tanqisligi kasalligi Qoraqalpog‘iston Respublikasi, Surxondaryo, Jizzax, Buxoro viloyatlarida mamlakat ko‘rsatkichlariga nisbatan baland bo‘lgan. Shuningdek, bolalar va o‘smirlar orasida ham yod yetishmovchiligi yuqori. Ushbu ko‘rsatkichlar “yod tanqisligi pandemiyasi” davom etayotganini anglatadi.
Ma’lum bo‘lishicha, 94 ta osh tuzi ishlab chiqaruvchi, sotuvchi va undan foydalanuvchi korxonaning bor-yo‘g‘i 24 tasida laboratoriyalar bor. Faqatgina 72 tasida dozatorlar o‘rnatilgan. Ammo o‘rnatilgan ayrim dozatorlar mutlaqo talabga javob bermaydi.
O‘rganishlar davomida Sirdaryo viloyatida hech qanday hujjatsiz tuzni qayta ishlash, saqlash, qadoqlash va tashish faoliyati bilan noqonuniy shug‘ullanib kelayotgan 4 ta korxona aniqlangan.
Ushbu korxonalarda tuzni yodlash dozatorlari mavjud emas. Omborlarda mahsulotlarni saqlash qoidalariga amal qilinmagan, qayta ishlab chiqarish uchun keltirilgan birlamchi tuzlarning tegishli hujjatlari, xususan, sertifikatlari mavjud emas. Tuz belgilangan talabga javob bermaydigan paketlarga qadoqlanmoqda. Mahsulot ishlab chiqarilgan sanalar ko‘rsatilmagan holda sotuvga chiqarilmoqda. Ayrim hollarda qadoqlarga yodlangan osh tuzi deb, aslida, yodlanmagan texnik tuz solinayotgani aniqlangan.
Ayrim tadbirkorlar tegishli qonunchilik hujjatlarida belgilangan imtiyozlarni suiiste’mol qilib, aholining sog‘lig‘i uchun zararli bo‘lgan mahsulotlarni sotishni davom ettirmoqda.
Majlis yakunlari bo‘yicha qo‘mitalarning takliflar aks etgan qo‘shma qarori qabul qilingan.
Izoh (0)