Samarqand viloyati hokimi Erkinjon Turdimovga o‘rinbosar, Qashqadaryo hokimi Murodjon Azimovga yangi maslahatchi tayinlandi. Bu haqda “Daryo” muxbirlari xabar berdi.
Samarqand hokimi o‘rinbosari — investitsiyalar va tashqi savdo boshqarmasi boshlig‘i lavozimida faoliyat olib borgan Oybek Erkinovich boshqa ishga o‘tishi munosabati bilan egallab turgan lavozimidan ozod etilib, uning o‘rniga Oybek Mirzabekov tayinlangan.
Oybek Mirzabekov 1980-yil Samarqand viloyatining Bulung‘ur tumanida tug‘ilgan bo‘lib, ushbu tayinlovga qadar “O‘zsanoateksport” AJ boshqaruvi raisi lavozimida faoliyat olib borgan.
Shuningdek, bugun Qashqadaryo hokimi Murodjon Azimovga ham yangi maslahatchi tayinlangan.
Qashqadaryo viloyati hokimi o‘rinbosari — viloyat mahalla va oilani qo‘llab-quvvatlash boshqarmasi boshlig‘i lavozimida ish yuritgan Dolli Allayev Murodjon Azimovga jamoatchilik bilan ishlash bo‘yicha maslahatchisi lavozimini egallagan.
Viloyat hokimligi axborot xizmati rahbari Ahror Sodiqovning qo‘shimcha qilishicha, ayni kunda viloyat hokimining maslahatchilari soni sakkiz kishidan olti nafarga tushgan.
“Viloyat hokimining xotin-qizlar masalalari bo‘yicha hamda turizm va sportni rivojlantirish masalalari bo‘yicha maslahatchisi lavozimlari qisqardi. Ayni paytda viloyat rahbarining faxriylar bilan ishlash bo‘yicha maslahatchisi, jamoatchilik bilan ishlash bo‘yicha maslahatchisi, axborot siyosati masalalari bo‘yicha maslahatchisi-matbuot kotibi, ma’naviy-ma’rifiy ishlar samaradorligini oshirish, davlat tili to‘g‘risidagi qonun hujjatlariga rioya etilishini ta’minlash masalalari bo‘yicha maslahatchisi, tashqi mehnat migratsiya masalalari bo‘yicha maslahatchisi va xalq ta’limi masalalari bo‘yicha maslahatchilari faoliyat yuritmoqda”, — deydi Ahror Sodiqov.
Izoh (0)