Pekin sudi jurnalist Dong Yuyuni josuslikda ayblab, yetti yillik qamoq jazosiga hukm qildi. Bu haqda Reuters agentligi xabar qildi.
Dong Yuyu Xitoy Kommunistik partiyasiga qarashli Guangming Daily gazetasida bo‘lim muharriri o‘rinbosari bo‘lgan. U 2022-yilda yapon diplomati bilan tushlik qilayotganda hibsga olingan. Yaponiyalik erkak ham bir necha soat hibsga olingan, bu esa Yaponiya Tashqi ishlar vazirligining noroziligiga sabab bo‘lgan.
Dong Yuyu oilasiga ko‘ra, hukmda jurnalist uchrashgan ikki yapon diplomati “ayg‘oqchi tashkilot agentlari” deb atalgan. Ma’lum qilinishicha, Dong Yuyu muntazam ravishda xorijiy diplomatlar va jurnalistlar bilan uchrashib turadi.
Dong Yuyu Guangming Daily gazetasida 1987-yildan beri ishlaydi. G‘arb ommaviy axborot vositalari yozishicha, u o‘z maqolalarida Xitoy rahbariyatini bevosita tanqid qilmasdan, mo‘tadil islohotlarni yoqlagan.
U 2007-yilda Garvard universitetida Niman stipendiyasini olgan va keyinchalik Yaponiya universitetlarida ma’ruza o‘qish uchun taklif qilingan.
Avvalroq Xitoy hukumatida ishlagan er-xotin Britaniya foydasiga josuslik qilishda ayblanib hibsga olingandi.
Xabar berilishicha, hibsga olinganlar Buyuk Britaniyaning MI6 maxfiy razvedka agentligiga maʼlumot uzatishda ayblangan.
Xitoyning Davlat xavfsizlik vazirligi hodisa yuzasidan maxsus bayonot eʼlon qilgan. Unda rasmiylar MI6 bilan bog‘liq “yirik josuslik ishi” fosh qilingani aytilgan. Ushbu fosh qilingan tarmoq, hech shubhasiz, Britaniya xatti-harakatlari natijasi ekanligi bildirilgan.
Izoh (0)