Shanxayda China International Import Expo — birinchi xalqaro import tovarlari va xizmatlari ko‘rgazmasi o‘z ishini boshladi. Unda dunyoning 130 dan ortiq mamlakatidan kelgan ishlab chiqaruvchilar, tadbirkorlar, innovatsion g‘oyalar markazi vakillari va investorlar ishtirok etmoqda. Bu haqda “Daryo”ga tadbirda ishtirok etayotgan jurnalist Muhammadjon Obidov ma’lum qildi.
Xitoy xukumati Shanxayga dunyoning barcha qit’alaridan OAVlar, tahlil markazi mutaxassislarini taklif etdi va bu anjumanni Xalqaro mediaforum deb atadi. Dunyoning 600 dan ziyod ommaviy axborot vositasi va tahlil markazlari vakillari huzurida Xitoy raisi Si Szinpin, Rossiya bosh vaziri Dmitriy Medvedev nutq so‘zladi. Umuman, Expo va mediaforumda 10 dan ortiq davlat rahbarlari ishtirok etmoqda.
Shundan so‘ng dunyo iqtisodi va u bilan bog‘liq mavzularni OAVda yoritish masalalariga bag‘ishlangan xalqaro mediaforum ishi boshlandi. Birinchi bo‘lib so‘zga chiqqan Xitoy matbuot kanselyariyasi vaziri Xuan Kunminga ko‘ra, Xitoy ochiq iqtisodiy siyosat yo‘lini tanladik. Chunki tashqi bozor ishtirokisiz mamlakat maqsadiga erisha olmaydi. Bu yil Den Syaopin boshchiligida Xitoyda ochiq iqtisodiy siyosat yo‘liga o‘tilganiga 40 yil to‘ldi. Bu davrda Xitoy qoloq davlatdan dunyoning yuksak iqtisodiyotga ega mamlakatga aylandi. Har bir davlatning milliy manfaatlarlari bor, lekin matbuotdagi iqtisodiy tahlil xolis bo‘lishi lozim. Bunda ommaviy axborot vositalarining hamkorligi kerak.
Yaponiya matbuoti rahbarlaridan biri Shinon Kita Amerika—Xitoy “savdo urushi” matbuotdagi mezonlarga ta’sir ko‘rsatayotganini kuzatyapmiz, Osiyo davlatlari OAVlari forumini tashkil etib, mavjud muammolarni birgalikda muhokama qilishga chaqiraman, dedi.
—Davlatlararo munosabatlarda iqtisod siyosatga nisbatan ustuvorlik kasb etyapti, shuning uchun biz maxsus iqtisodiy masalalarni yoritadigan telekanal ochdik, — ta’kidladi XXR teleradiokorporatsiyasi rahbari Jen Jaijong.
Rossiya vakili Aleksandr Bistritsskiy muhim masalani o‘rtaga tashladi.
— OAVdagi axborot doim ham xaqiqatni aks ettirolmaydigan zamonda yashayapmiz. Bu dunyodagi ziddiyatlar va davlat manfaatini yuqori qo‘yish bilan bog‘liq, — dedi u. — OAVdagi aslida haqiqatdan yiroq ma’lumotlar tufayli davlat rahbarlari ba’zida xavfli qarorlar qabul qilyapti. Ommaviy axborot vositasi o‘z chiqishlarida haqiqatni yolg‘ondan ajratib berishi kerak.
Shanxaydagi Expo ko‘rgazmasi va mediaforum davom etmoqda.
Izoh (0)