AQSH ehtimoliy urush fonida Yaqin Sharqqa qo‘shimcha kuchlar yubormoqda. Bu haqda AQSH mudofaa vazirligidagi manbaga tayanib, France24 xabar berdi.
AQSH Eron Isroilga hujum qilishi mumkinligidan xavotiri kuchaygani sabab Yaqin Sharqqa qo‘shimcha kuchlar yuborayotganini e’lon qildi.
Biz mintaqaviy jilovlash sa‘y-harakatlarini qo‘llab-quvvatlash va AQSH kuchlari himoyasini kuchaytirish uchun mintaqaga qo‘shimcha kuchlarni olib boryapmiz”, — dedi AQSH Mudofaa vazirligining anonim rasmiysi.
U vazirlik Eronning Isroilga qarshi keng ko‘lamli hujumidan qo‘rqishini ta’kidladi. 12-aprel kuni Isroil mudofaa vaziri Yoav Gallant va AQSH generali Erik Kurilla bilan Eronning Isroilga ehtimoliy hujumiga tayyorgarlik ko‘rish yuzasidan uchrashuv o‘tkazdi.
Gallant idorasi bayonotiga ko‘ra, Eronning Isroilga qarshi hujumi mintaqaviy keskinlashuvga olib kelishi mumkin. Bunga esa aslo yo‘l qo‘yib bo‘lmasligi ta’kidlanib, Isroilni qo‘llab-quvvatlagani uchun Gallant AQSHga minnatdorlik bildirgan.
Eron va Isroil o‘rtasidagi urush ehtimoli
Keng ko‘lamli urush ehtimoli Isroil 1-aprel kuni Eronning Damashqdagi konsulligiga hujum qilganidan so‘ng boshlandi. Hujum oqibatida 11 kishi, jumladan, 2016-yilgacha Livan va Suriyadagi “Quds” elita kuchlariga rahbarlik qilgan Eron harbiy maslahatchisi general Muhammad Rizo Zohidiy, uning o‘rinbosari general Muhammad Hodi Hoji Rahimiy va yana besh eronlik zobit ham halok bo‘ldi. Shuningdek, uch nafar Suriya va bir nafari Livan fuqarosi vafot etdi.
Eronning BMT missiyasi zarbani terakt deb baholadi. Eron tashqi ishlar vaziri Husayn Amir Abdullohiyan mazkur hujum munosabati bilan Amerika javobgarlikka tortilishi kerakligini aytdi. Shundan keyin AQSH razvedkasi Isroilni Eronning javob zarbalaridan ogohlantirdi. Buning fonida Isroil bir qator davlatlardagi elchixonalarini vaqtinchalik yopdi va xodimlarga ishga kelmaslik so‘raldi.
AQSH Markaziy razvedka boshqarmasi Isroil rasmiylarini “yaqinda sodir bo‘ladigan ommaviy hujum” haqida ogohlantirgan. Amerika rasmiylarining ta’kidlashicha, Eron kamida uchta yadroviy bomba ishlab chiqarish uchun yetarli darajada boyitilgan uranga ega. Bu haqda rasmiy ma’lumot yo‘q, ammo Eronning ballistik raketalari Isroilga zarba bera oladi.
Izoh (0)