BMT bosh kotibi Antoniu Guterrish Isroilni konflikt zonalarida bolalarga ataylab zarar yetkazuvchi va o‘limiga sabab bo‘luvchi davlatlarning qora ro‘yxatiga kiritishini e’lon qildi. Bu haqda WAFA axbort agentligi xabar berdi.
Guterrish Isroilning AQSHdagi mudofaa attashesi general-mayor Hiday Zilbermanga tegishli ogohlantirishni yetkazgan. Yahudiy davlati ISHID, “Al Qoida” kabi guruhlar kiritilgan qora ro‘yxatdan joy olishi kutilmoqda. 26-iyun kuni muhokama qilinishi rejalashtirilgan BMT xavfsizlik kengashi a’zolariga tarqatiladigan hisobotda bu aks etadi. Isroil qora ro‘yxatga kirish mamlakatga qarshi qurol embargosiga olib kelishi mumkinligidan xavotirda.
Isroilning Guterrishni bunday qilmaslikka ko‘ndirish borasidagi keng ko‘lamli harakatlari muvaffaqiyatsizlikka uchradi, — deyiladi xabarda.
Avvalroq qora ro‘yxatga Afg‘oniston, Kongo, Mali, Myanma, Somali, Sudan, Yaman, Suriya kabi davlatlar hamda “Al Qoida”, ISHID, “Al Shabob”, “Boko Haram” kabi tashkilotlar kiritilgandi. Qora ro‘yxatga qo‘shilish Isroilning obro‘siga jiddiy zarar yetkazishi kutilmoqda. Chunki hisobot xalqaro miqyosda katta qiziqish uyg‘otadi va BMT organlari, jumladan, Bosh assambleya, Xavfsizlik kengashi, Xalqaro sud va Gaagadagi xalqaro jinoiy sud tomonidan tilga olinadi.
Izoh (0)