Сурия шимоли-ғарбида охирги уч кун ичида жангларда камида 27 нафар тинч аҳоли вакили ҳалок бўлди. Бу ҳақда БМТ минтақавий гуманитар координатори ўринбосари Девид Карден маълум қилган.
Унинг сўзларига кўра, ҳалок бўлганлар орасида саккиз ёшли болалар ҳам бор. У ўлдирилган болаларнинг аниқ сонини айтмади.
“Биз Сурия шимоли-ғарбида юзага келаётган вазиятдан чуқур хавотирдамиз. Тинч аҳоли ва фуқаролик инфратузилмасини нишонга олиш мумкинмас ва улар халқаро гуманитар қонунларга мувофиқ ҳимоя қилиниши керак”, деди Кардин Reuters агентлигига берган интервьюсида.
27 ноябрь куни Идлиб вилоятидаги энг йирик исёнчи анклавни назорат қилувчи жанговар гуруҳлар томонидан Алеппога ҳужум бошланди. Кеча, 28 ноябрь куни Россия Мудофаа вазирлиги Сурия ҳарбийлари Россия Федерацияси кўмагида Алеппо ва Идлибда 400 нафар жангарини йўқ қилгани ҳақида хабар берди.
Исёнчилар ва ҳукумат ўт очишни тўхтатиш бўйича келишувга эришган 2020 йилдан бери бу ҳудудда можаро энг кескин нуқтага чиқди. Жангарилар ўз ҳаракатларини Сурия армияси ва унинг иттифоқдош эронпараст тузилмалари, жумладан, “Ҳизбуллоҳ” ҳаракати томонидан ҳужумлар сони ортиб бораётгани билан изоҳлаган.
Россия ва Сурия ҳарбий самолётлари 28 ноябрь куни Суриянинг Туркия билан чегараси яқинидаги “Ҳаят Таҳрир аш-Шом” жиҳодчи гуруҳи назоратидаги шимоли-ғарбий ҳудудларни бомбардимон қилгани ҳақида хабар берилган.
Сурия армияси кутилмаган кампания бошланганидан кейинги биринчи баёнотида гуруҳга катта талафотлар берганини маълум қилган.
Армия ўз мавқейини ва аввалги вазиятни тиклаш учун Россия ва номи ошкор этилмаган “дўст кучлар” билан ҳамкорлик қилаётганини айтган.
Сурия армиясидаги манбага кўра, исёнчилар Ҳалаб шаҳри чеккасидан қарийб 10 километр ва Ливан “Ҳизбуллоҳ”и назорат ўрнатган шиаларнинг икки шаҳарчаси Нубла ва Заҳра томон силжиган.
Изоҳ (0)