Jinoyat olamida “qonundagi o‘g‘ri — Baxti Tashkentskiy” maqomini olgan Baxtiyor Qudratullayev va 36 nafar ayblanuvchi bo‘yicha sud majlisi qisqa tanaffusdan so‘ng, 5-iyun kuni o‘z ishini davom ettirdi. Bu haqda sudda qatnashgan “Daryo” jurnalisti xabar berdi.
Sudda so‘z olgan Baxtiyor Qudratullayev qamoqdan chiqqanida davlat tashkiloti vakillari unga aloqaga chiqib, mamlakatda yoshlar, sportchilar orasida pichoqbozlik ko‘payib ketayotgani uchun “ko‘cha”ni tartibga solishni so‘raganini aytdi.
Bundan ajablangan sudya “Siz davlat tashkilotida rasmiy ishlaganmisiz?” deb so‘radi. Sudlanuvchi bunga javoban yoshligidan boshlab, umrining asosiy qismi qamoqda o‘tganini aytdi.
“Yoshligingizdan o‘tirgan bo‘lsangiz, davlat sizga qanday topshiriq berishi mumkin?”, — dedi sudya. “Buni ulardan so‘rash kerak”, — dedi “Baxti Tashkentskiy”.
Sudlanuvchining so‘zlaridan ajablangan sudya “Tartibga solishga huquqni muhofaza qiluvchi organlarning kuchi yetsa kerak, to‘g‘rimi?”, — deya savol berdi. Baxtiyor Qudratullayev “to‘g‘ri”, dedi. “Unda nima uchun davlat sizga topshiriq bergan?”, deya takroriy so‘radi sudya.
Baxtiyor Qudratullayev bunga javoban o‘sha yillari O‘zbekistonda yoshlar va sportchilar orasida pichoqbozlik ko‘payganini, davlat tashkiloti ular bilan hamkorlik qilgach, bu jinoyatchilik 60 foizga kamaygani haqida ma’lumotlar aytilganini bildirdi.
“Bunday statistikani kim yuritgan”, — deb so‘radi sudya. Sudlanuvchi esa u bilan aloqaga chiqqan davlat tashkiloti mas’ullar shunday ma’lumot berishganini aytdi. Biroq ularning aynan kim ekanligiga aniqlik kiritmadi. Sudya ham bu haqda undan so‘ramadi.
Eslatib o‘tamiz, 2023-yil 2-dekabr kuni Toshkent shahrida “Saidaziz medgorodok” laqabi bilan tanilgan shaxs qo‘lga olingani maʼlum bo‘ldi. U atrofiga jismonan baquvvat shaxslarni to‘plab, qarzdorlik va boshqa muammolarni qonunni chetlab o‘tgan holda hal qilib berish bilan shug‘ullangan. 3-dekabr kuni esa huquq-tartibot idoralari xodimlari “Baxti Tashkentskiy” laqabi bilan tanilgan Baxtiyor Qudratullayevni qo‘lga oldi.
Ko‘p o‘tmay Toshkent shahrida profilaktik tadbir davomida Salimboy nomi bilan tanilgan Salim Abduvaliyev ham ushlandi. 1950-yilda tug‘ilgan Abduvaliyev Salim Kirgizbayevich (248-modda 1-qismi, o‘qotar qurolni qonunga xilof ravishda saqlash) gumon qilinuvchi tarzida jalb etilgan. Mart oxirlarida unga 6 yil muddatga ozodlikdan mahrum qilish jazosi tayinlangani maʼlum bo‘ldi.
Izoh (0)