O‘zbekistonda 2023-yilning dekabr oyiga qadar yuzlab, minglab tadbirkorlar “ko‘cha” zo‘ravonligiga uchragan, tahdidlar qurboni bo‘lgan. Natijada milliardlab daromad keltiradigan biznesidan ajralgan. O‘sha yili “ko‘cha” faoliyatiga chek qo‘yilgach, jabrdiyda tadbirkorlar yurak yutib, huquqni muhofaza qiluvchi organlarga shikoyat qilgan.
“Daryo” ana shunday ko‘cha zulmidan aziyat chekib, biznesidan ajralgan tadbirkor Murod To‘xtayev bilan suhbatlashdi.
Tadbirkorning tushuntirishicha, u biznesdagi hamkori Sobir Isomuhammedov bilan 2005-yilda pechenye zavod tashkil etgan bo‘lib, zavodning daromadi milliardlarga yetganda o‘zaro kelishmovchilik yuzaga kelgan. Dastlab zavoddan haydalgan Murod To‘xtayev 2022-yili “ko‘cha” nomi bilan tanilgan Saidaziz Saidaliyev talabi bilan hujjatdan ham o‘chirilishi kerak bo‘lgan. Biroq ayrim sabablarga ko‘ra, hujjat ishlari to‘xtab qolgan.
2022-yili kunlarning birida biznesdagi hamkorim Sobir Isomuhammedov Mirobod tumanidagi ofisiga chaqirdi. Kechki payt soat 8 da borsam, ofisga kirishim bilan menga do‘q qilib, biznesdagi ulushimdan voz kechishim kerakligini, mening daromadga umuman haqqim yo‘qligini aytib, “osonlikcha ulushingdan kech”, dedi. Agar kechmaydigan bo‘lsam, ulushimni Saidaziz yordamida mendan tortib olishini ma’lum qildi. Birozdan so‘ng yonimizga kirib kelgan Saidaziz va uning yigitlari ulushimdan o‘z xohishim bilan voz kechishim kerakligini, ertadan boshlab zavod uniki ekanini aytdi. Menga do‘q qildi. O‘ldirib yuborishini ta’kidladi.
Sobir aka Saidazizga “bunga kechagi joyni ko‘rsat” degach, Saidaziz va uning sheriklari meni oltincha qavat derazasi yoniga olib borishdi. Agar biznesdagi ulushimdan voz kechmasam, ikki qo‘lim va boshimni derazadan chiqarib, shu yerdan tashlab yuborishlarini, o‘ldirishlarini bildirdi. Men esa qo‘rqqanimdan “xo‘p, ulushimni beraman” dedim. Ertasiga notariusga borib, qo‘l qo‘yib berishga rozi bo‘ldim va yarim kechasi soat ikkida uyimga qaytdim, — deydi tadbirkor.
Jabrlanuvchining bildirishicha, bu voqeaga uning jiyani Alisher va Farrux ismli hisobchisi guvoh bo‘lgan.
O‘sha kuni Farrux ismli hisobchimizni ham chaqirtirishdi. 2009-yildan 2022-yilgacha bo‘lgan barcha hisob-kitoblarni ko‘rsatdik. Shunga qaramasdan Farruxga ham bosim qilishdi, qo‘rqitishdi. O‘sha kungi voqealarga jiyanim Alisher va Farrux guvoh. Bizni yarim kechasi soat ikkigacha ushlab o‘tirishdi. Keyin ertasi kuni notariusga borib, ulushimni o‘tkazib berishni va’da qilib, uyga qaytdik, — deydi suhbatdosh.
Murod To‘xtayevning aytishicha, ular uyga qaytayotgan paytda militsiyaga murojaat qilmaslik haqida ogohlantirilgan.
“Militsiyaga bormagin, hamma joyda mening ko‘z-qulog‘im bor. Agar biror joyga borib, shikoyat qilsang o‘zingdan ko‘r”, deb qo‘rqitishdi, — deydi u.
Ko‘cha zulmidan qutilgan tadbirkor o‘sha kuni tongda Farg‘ona viloyatiga jo‘nab ketgan.
Ishlar sal tinchisin dedim, qolaversa ulardan qo‘rqqanim uchun Farg‘onaga jo‘nab ketdim. Yo‘lda ketayotsam, telefon qilishdi va kechagi gap haliyam kuchda deyishdi. Takror-takror telefon qilishgach, ertasi kuni Toshkentga qaytib keldim. Kelishim bilan ofisimga Aziz va Jamshid ismli bolalar kelib, hujjatlar tayyor ekanini qo‘l qo‘yib bersam yetarli bo‘lishini bildirishdi. “Agar qo‘l qo‘ymasang, Sobir Isomuhammedov va Saidazizlar senga yomon bo‘lishini takrorlashdi. O‘ldiramiz” deyishdi, — deydi tadbirkor.
Murod To‘xtayevning aytishicha, Jinoyat ishlari bo‘yicha Yunusobod tuman sudida 2024-yilning 14-iyun kuni Saidaziz Saidaliyev va ikki nafar kishining unga nisbatan qilgan xatti-harakatlari uchun yana bir sud ishi boshlangan. Sud ishi doirasida Saidaziz Saidaliyev Jinoyat kodeksining 165-modda 3-qismi “a” bandi, “v” bandi (tovlamachilik), Sobirjon Isomuhammedov 165-modda 3-qismi “a” bandi, “v” bandi (tovlamachilik), 168-modda 3-qismi “a” bandi, “b” bandi (firibgarlik), 168-modda 3-qismi “a” bandi (firibgarlik) hamda Mirsolix Mirxo‘jayev 165-modda 3-qismi “a” bandi, “v” bandi (tovlamachilik) bilan ayblanmoqda.
Bugungi kunlarda davom etayotgan sudda Saidaziz va yonidagi yigitlari sud qilinmoqda. Ular buyurtmani bajargani uchun javob beryapti. Lekin buyurtmachi ochiqda yuribdi-ku. Tag‘inam garov ehtiyot chorasi qo‘llanilgan bo‘lsa-da, mas’ul tashkilotlar xabardor qilinmagan holda haj safariga jo‘nab ketibdi. Zoir degan bola guvoh bo‘lib o‘tibdi. Asad degan bola umuman ko‘rinmayapti. Ular ham o‘sha kuni voqeaning asosiy ishtirokchisi bo‘lgan-ku. Sobir Isomuhammedov haj safarida yurganini isbotlash uchun menga rasm tashlab yuboribdi. Qo‘lingdan nima keladi deb, — deydi tadbirkor.
Tadbirkor Murod To‘xtayevning qo‘shimcha qilishicha, Sobir Isomuhammedov bilan 2005-yilda boshlagan sheriklik asosidagi tadbirkorlik faoliyati dastlab rivojlanmay, bankrotlik yoqasiga kelgan. Biznes yillar o‘tib, o‘zini oqlab, daromad keltira boshlagan. Bo‘sh turgan binosi va mavjud eski dastgohlarini bergan ulushdor Sobir Isomuhammedov daromad kela boshlagach, sherigi Murod To‘xtayevni uni aldayotganlikda, asosiy daromadni yeb ketishda ayblagan. Din peshvosining oldiga olib borib, biznes boshlanishiga katta hissasi borligini aytib, haqdorligi borasida so‘ragan. Shunda ham ko‘ngildagidek javob ololmagach, sherigiga MCHJ tashkil etib, teng ulushdor sifatida ishlashni taklif qilgan. Ko‘p o‘tmay, yana g‘irrom yo‘lni tanlab, pechenye zavodining oyoqqa turishiga sababchi bo‘lgan tadbirkorni “o‘yindan chiqarish”ga uringan. Alaloqibat 2019-yildan boshlab, sherigi Murod To‘xtayevni zavodga ham kiritmay qo‘ygan. Va shu kunga qadar u o‘z mulkiga egalik qilolmayapti.
Izoh (0)