Maxsus prokuror Jek Smit suddan AQSHning g‘alaba qozongan prezidenti Donald Trampga qarshi ishni to‘xtatishni so‘radi.
Sudya Tanya Chutkan nomiga bergan bayonotida Smit AQSH konstitutsiyasi sudlanuvchining inauguratsiyasidan oldin ishni tugatishni talab qilishini tushuntirdi. O‘sha kuniyoq Chutkan ishni rasman to‘xtatdi.
Saylov kampaniyasi vaqtida Tramp Oq uyga qaytishi bilanoq Jek Smitni ishdan bo‘shatishini aytgan edi.
Tramp matbuot kotibi Stiven Chung o‘z bayonotida bu harakatni “qonun ustuvorligining yirik g‘alabasi” deb atadi, deb xabar bermoqda CNN.
AQSHda Trampga qarshi jinoiy va fuqarolik ishlari
2020-yilgi prezidentlik saylovlari natijalarini tasdiqlashga aralashishga urinish hamda 2021-yil yanvarida Kapitoliyga bostirib kirish bo‘yicha ayblovlar Trampga 2023-yil avgustida qo‘yilgan edi. O‘sha paytda maxsus maslahatchi Smit Kapitoliy tepaligidagi zo‘ravonlik uchun aybni to‘g‘ridan-to‘g‘ri Trampga yuklagan edi. Ayblov xulosasida jami to‘rtta band mavjud: AQSH hukumatini aldash va Kongressning demokrat Jo Baydenning g‘alabasini tasdiqlashiga to‘sqinlik qilib, saylovchilarning adolatli AQSH saylovlariga bo‘lgan huquqlarini buzish, tergovga to‘sqinlik qilish va shu maqsadda fitna uyushtirish.
Kapitoliyga bostirib kirishda ayblovlardan tashqari, Tramp maxfiy hujjatlarni noto‘g‘ri saqlash, Jorjiya shtatidagi saylovlarga aralashish va 2016-yilgi saylovlar oldidan porno yulduz Stormi Danielsga to‘lovlar bilan bog‘liq biznes yozuvlarini soxtalashtirishda ham ayblangan.
Iyul oyi o‘rtalarida sud Trampga nisbatan 2021-yilda AQSH prezidentligidan ketganidan keyin o‘z uyida saqlagan maxfiy hujjatlar bo‘yicha jinoiy ish qo‘zg‘atilgan edi. Bu ish bo‘yicha ayblovlar Trampga 2023-yil iyun oyida qo‘zg‘atilgan. Prokurorlar shundan so‘ng hujjatlar AQSH harbiy va razvedkasi masalalariga, jumladan, Qo‘shma Shtatlar yadroviy dasturiga oid tafsilotlarga tegishli ekanligini aytgan.
Shu yilning iyul oyida sudya Smitning ish bo‘yicha maxsus maslahatchi etib tayinlanishini konstitutsiyaga zid deb topdi. Shundan so‘ng Tramp unga qarshi boshqa barcha jinoiy ishlarni to‘xtatishga chaqirdi. Smit bu qaror ustidan apellyatsiya berdi va 25-noyabr kuni suddan Trampni ushbu ish bo‘yicha hammualliflar qatoridan chiqarib tashlashni so‘radi, deb yozadi WP.
2024-yil iyun oyi boshida Jorjiya apellyatsiya sudi sobiq prezidentning bosh prokuror Fani Uillisni lavozimidan chetlashtirish haqidagi iltimosini ko‘rib chiqqanligi sababli Trampga nisbatan jinoiy ish qo‘zg‘atilishini to‘xtatgan. Sudga borgan yagona ish porno aktrisaga to‘lovlar bilan bog‘liq edi. May oyida Nyu Yorkdagi hakamlar hay’ati Trampni to‘lovlarni yashirish uchun hujjatlarni qalbakilashtirishning barcha 34 ta bandi bo‘yicha aybdor deb topgan, biroq hech qanday hukm chiqarilmagan.
Tramp jinoiy javobgarlikka tortilgan birinchi sobiq prezident bo‘ldi. The Wall Street Journal’ning qayd etishicha, uning saylovdagi g‘alabasidan so‘ng, AQSH Adliya vazirligining siyosati amaldagi prezidentga qarshi ayblovlar qo‘yishni taqiqlaydi.
Izoh (0)