Rossiya tashqi savdo banki rahbari Andrey Kostin Rossiyada ishchi kuchining halokatli yetishmovchiligi mavjudligini va shu sababli mamlakatning migrantlarga muhtojligini ta’kidladi. U bu haqda Rossiya Federal moliya universitetining “Yangi iqtisodiy siyosat 2.0: moslashuvdan yutuqqacha” IX xalqaro forumining yalpi majlisida ma’lum qilgan.
Kostinning fikricha, ishchi kuchi tanqisligi iqtisodiyot rivojlanishini cheklaydi. U kadrlar yetishmasligini “halokatli” deb baholadi.
“Aytgancha, bizda migrantlarga nisbatan munosabat keskin yomonlashdi. Lekin, do‘stlar, bugungi kunda iqtisodiyotimiz migrantlarsiz nafas ololmaydi, biz baribir bu masalani hal qilishimiz kerak. Albatta, ularni haydab chiqarish oson, ammo kimdir ishlashi kerak-ku”, deya afsus bilan ta’kidlagan bankir.
Kostinning ma’lum qilishicha, TSB boshqaruviga o‘tkazilgan Birlashgan kemasozlik korporatsiyasida turli kasblar bo‘yicha ishchi kuchi tanqisligi 10 foizdan 20 foizgacha yetadi.
Yaqinda FinExpertiza auditorlik-konsalting tarmog‘i Rossiyada kadrlar tanqisligi rekord darajaga yetganini ma’lum qilgan edi. Sentyabr oyi oxiriga kelib, ish bilan ta’minlanmagan rossiyaliklar soniga nisbatan xodimlarni qidirish bo‘yicha e’lonlar soni 5 ga 1 nisbatni tashkil etdi.
Eng katta kadrlar taqchilligi Amur viloyatida kuzatilmoqda. U yerda har bir ishsizga 29 ta bo‘sh ish o‘rni to‘g‘ri keladi. Leningrad viloyatida bir nafar ishsizga 25 ta, Nijniy Novgorod viloyatida 22 ta, Tula viloyatida 20 ta va Oryol viloyatida bir nafar ishsizga 13 ta ochiq vakansiya to‘g‘ri keladi.
Krasnodar o‘lkasida ish qidirayotganlarga qaraganda 80,7 ming kishiga, Moskvada esa 79,7 ming kishiga ko‘proq ishchiga talab mavjud. Shu bilan birga, Ingushetiyada bir ish qidiruvchiga atigi 0,01 ta, Chechenistonda ishsizga 0,1 ta, Tuva va Dog‘istonda esa 0,5 tadan bo‘sh ish o‘rni to‘g‘ri keladi.
Sentyabr oyi oxirida rossiyalik ish beruvchilarga 2 million ishchi yetishmayapti. Bandlik xizmati organlariga 392 ming kishi murojaat qilgan. Ya’ni ish izlovchilar taqchillikning faqat beshdan bir qismini qoplashi mumkin. Bu 2005-yildan buyon kuzatilgan barcha davrdagi eng past ko‘rsatkich hisoblanadi.
Eng kuchli kadrlar taqchilligi savdoda, ayniqsa chakana savdoda kuzatilgan. Shuningdek, qo‘riqlash va tozalov kompaniyalarida hamda ma’muriy faoliyat sohasida ham xodimlar tanqisligi mavjud.
Moskva bo‘yicha Federal sud ijrochilar xizmati (FSSP) Bosh boshqarmasi matbuot xizmatining ma’lum qilishicha, joriy yilda Moskvadan chet elga majburiy tarzda chiqarib yuborilgan chet el fuqarolari soni 37 foizga oshgan.
Chiqarib yuborilganlarning aksariyati MDH davlatlaridan bo‘lib, ular orasida eng ko‘p O‘zbekiston, Tojikiston va Qirg‘iziston fuqarolari bo‘lgan.
Avvalroq Rossiyaning Lipetsk viloyati gubernatori Igor Artamonov mehnat muhojirlari qonuniy va noqonuniy bo‘lishi, ammo ikkalasini ham xush ko‘rmasliklarini ma’lum qilgandi.
Izoh (0)