Toshkentda “Saidaziz medgorodok” laqabi bilan tanilgan Saidaziz Saidaliyev jismonan baquvvat bir nechta shaxsni o‘z atrofiga to‘plab, o‘ldirish yoki zo‘rlik ishlatish bilan qo‘rqitish kabi jinoyatlarni sodir qilganlikda ayblanmoqda.
1987-yil Toshkent shahrida tug‘ilgan Saidaziz Saidaliyev qarzdorlik va boshqa muammolari bo‘lgan shaxslar masalasini qonunni chetlab o‘tgan holda hal qilib berishi evaziga moddiy jihatdan manfaatdor bo‘lib kelgan. Shu sabab u fuqarolarga tahdid qilib, pul mablag‘larini noqonuniy qo‘lga kiritgan.
“Adolat” axborot tizimlari kompleksining sud majlislari jadvaliga ko‘ra, “Saidaziz medgorodok” hamda yana 28 kishining sudi 2024-yilning 11-iyun kuni soat 10:00 da boshlanadi.
Guruhning asosiy a’zosi Saidaziz Saidaliyev Jinoyat kodeksining 165-moddasi 3-qismi “a” va “v” bandi (tovlamachilik), 168-moddasi 4-qismi “a” va “v” bandi (firibgarlik), 211-moddasi 3-qismi “a” va “b” bandi (pora berish), 242-moddasi 1-qismi (jinoiy uyushma tashkil etish), 243-moddasi (jinoiy faoliyatdan olingan daromadlarni legallashtirish), 277-moddasi 2-qismi “b” va “v” bandi (bezorilik), 277-moddasi 3-qismi “a” bandi (bezorilik) bilan ayblanmoqda.
Aniqlashtirilishicha, Saidaziz Saidaliyev va uning sheriklaridan jabrlanganlar soni 30 nafardan ortiq. Ular orasida tadbirkorlar ham bor.
“Saidaziz medgorodok” va uning sheriklari, shuningdek, ayni paytda sudi davom etayotgan “Baxti Tashkentskiy” ham Toshkent shahar IIBB poytaxtda kriminogen vaziyatni yaxshilash bo‘yicha keng qamrovli tezkor-profilaktik tadbirlar o‘tkazgan paytda qo‘lga olingandi.
Izoh (0)