O‘zbekistonda “qonundagi o‘g‘ri — Baxti Tashkentskiy” maqomini olgan Baxtiyor Qudratullayev va 36 nafar ayblanuvchi bo‘yicha sud majlisi boshlangani haqida xabar berilgandi. Sudlov hay’ati 2024-yilning 10-iyun kuni davom etgan navbatdagi sud majlisida jarayonni OAVda yoritishni taqiqladi. Sudda jurnalistlarning video hamda audioma’lumotlar olishiga chek qo‘yildi. Bu haqda sudda qatnashgan “Daryo” jurnalisti xabar berdi.
Jurnalistlarga sud majlisida video va audioyozuv olib borishni sud taqiqladi. Ochiq sud majlisi bo‘lgani uchun ishtirok etishlari mumkin, xohlashsa, rasm chizib o‘tirishsin, — deydi bu haqda sud ajrimi chiqarilganini aytgan JIB Shayxontohur tuman sudi raisi Tolibjon Obidov.
2024-yilning 3-iyun kuni Jinoyat ishlari bo‘yicha Yunusobod tuman sudida JIB Shayxontohur tuman sudi raisi Tolibjon Obidov boshchiligidagi sudlov hay’ati “ko‘cha” nomini olgan to‘da ishini ko‘rib chiqishni boshlagandi.
Eslatib o‘tamiz, 2023-yil 2-dekabr kuni Toshkent shahrida “Saidaziz medgorodok” laqabi bilan tanilgan shaxs qo‘lga olingani maʼlum bo‘ldi. U atrofiga jismonan baquvvat shaxslarni to‘plab, qarzdorlik va boshqa muammolarni qonunni chetlab o‘tgan holda hal qilib berish bilan shug‘ullangan. 3-dekabr kuni esa huquq-tartibot idoralari xodimlari “Baxti Tashkentskiy” laqabi bilan tanilgan Baxtiyor Qudratullayevni qo‘lga oldi.
Ko‘p o‘tmay Toshkent shahrida profilaktik tadbir davomida Salimboy nomi bilan tanilgan Salim Abduvaliyev ham ushlandi. 1950-yilda tug‘ilgan Abduvaliyev Salim Kirgizbayevich (248-modda 1-qismi, o‘qotar qurolni qonunga xilof ravishda saqlash) gumon qilinuvchi tarzida jalb etilgan. Mart oxirlarida unga 6 yil muddatga ozodlikdan mahrum qilish jazosi tayinlangani maʼlum bo‘ldi.
Izoh (0)