Toshkent shahar hokimligi va Yoshlar ishlari agentligi Toshkent shahar boshqarmasi tomonidan “Toshkent yoshlarni sevadi” oyligi doirasida ishsiz yurgan yoki onalik taʼtilidagi ayol-qizlar uchun “Poytaxtning SMMchi qizlari” loyihasi tashkil qilindi.
Mazkur kursda tinglovchilar safi tobora kengayib, ko‘plab ayollarda qiziqish uyg‘otdi. Jumladan, 27 yoshli, ikki farzandning onasi Feruza Rahmatova onalik taʼtili vaqtida ushbu kursda o‘qimoqda.
“Onalik taʼtili ayolga bir qadar quvonch ulashsa, bir qadar tund kayfiyat ham ulashishi sir emas. Aksariyat onalik taʼtilidagi ayollar o‘zini jamiyatdan orqada qolayotganday his qiladi. O‘zim 7 yildan buyon onalik taʼtilidaman. Bolalarim hozir bog‘chaga borishadi. Bo‘sh vaqtlarimda qo‘shimcha biror ish qilib, daromad topish istagim bor edi. Ijtimoiy tarmoqlar orqali bepul SMM kurslari eʼloniga ko‘zim tushdi. Darhol ro‘yxatdan o‘tdim. Biroz muddatdan so‘ng mashg‘ulot adminlari menga qo‘ng‘iroq qilib, kursga qabul qilinganimni maʼlum qilishdi. Darslar qisqa muddatda menda yaxshi taassurot uyg‘otdi. Mashg‘ulotlar kunning to‘rtta qismida tashkil qilingani yosh onalar o‘zlari istagan vaqtda kelib qatnashish imkonini beradi. Bu esa biz uchun ayni muddao”, deydi Feruza Rahmatova.
Uning aytishicha, mentorlar — bizga dars beruvchi ustozlar metodlari juda tartibli. Har bir trener internetdagi onlayn darslardan farqli ravishda sohaning mayda detallarigacha tushuncha bermoqda.
“Bilasiz, SMM o‘z ichiga kopirayting, target, mobilografiya, grafik dizayn kabi bir nechta yo‘nalishlarni oladi. Men o‘zim ijodkorman, sheʼrlar yozaman. Kasbim jihatidan esa rejissyorman. Shundan kelib chiqib, mazkur zamonaviy kasbni o‘rgansam faoliyatimga ham ijodiy yondashishimga ishonaman. Shu sabab har bir yo‘nalishni puxta o‘rganishga harakat qilyabman.
Kelgusida uyda o‘tirgan qizlar va onalik taʼtilidagi ayollar uchun SMM sir-asrorini o‘rgatuvchi taʼlim blogi ochish niyatim bor. Bunda uydan chiqmagan holda qiz-ayollar onlayn kurslarda tahsil olishi va o‘zining ijodiy ishlaridan eng sara namunalarini sahifada eʼlon qilishlari mumkin bo‘ladi”, deya qo‘shimcha qiladi Feruza Rahmatova.
Izoh (0)