IT Park grafik dizayn orqali oyiga 700 dollar topayotgan navoiylik yigit haqida hikoya qildi.
![](/static/2023/Biznes/sanjar.jpg)
Shodmonov Sanjar Navoiy viloyati, Navoiy shahrida tug‘ilgan. IT sohasiga o‘zining ilk qadamlarini 22 yoshda qo‘ygan, hozirgi kunda IT sohasining grafik dizayn yo‘nalishi bo‘yicha malakali mutaxassis.
Hozirda Shodmonov Sanjar 25 yoshda bo‘lib, yosh bo‘lishiga qaramay IT Park Navoiy viloyati filialida SMM menejer hamda IT markazda grafik dizayn kursi bo‘yicha o‘qituvchilik qiladi. Shu kunga qadar 100 ga yaqin o‘quvchilarga ta’lim bergan.
Bugungi kunda uning o‘quvchilarining bir qismi IT kompaniyalarda, yana bir qismi O‘zbekiston ichki bozorida o‘z-o‘zini band qilgan holda frilanserlik faoliyati bilan shug‘ullanmoqda. Shuningdek, bir necha o‘n nafari grafik dizayner o‘qituvchisi bo‘lib faoliyat olib bormoqda.
Sanjar markazda o‘quvchilarga ta’lim berishidan tashqari O‘zbekiston ichki bozoridagi buyurtmalarni ham bajarib boradi. Oylik o‘rtacha daromadi 500-700 dollarni tashkil etadi.
Uning fikricha, jamoaviy ishlashning asosiy afzallik tomonlari ishlar teng taqsimlanishi, barcha loyihalar o‘z vaqtida bajarilishi. Odamlar bilan birga ishlashni va muloqot qilishni o‘rganish, kirishimlilik, malaka oshirish, fikr almashish kabi malaka va qobiliyatlarni ham rivojlantiradi.
Sanjar kelajakdagi rejalari O‘zbekistonda IT sohasini yanada rivojlantirishni va yetuk IT-mutaxassislar yetishtirib chiqarib, salohiyatli kadrlarning rivoji bo‘yicha Navoiy hududini Respublika miqyosida 1-o‘ringa olib chiqishdan iborat.
Sanjarbek o‘zining misolida ishtiyoqi bo‘lgan har qanday inson IT mutaxassisi bo‘lishi mumkinligini ko‘rsatib bermoqda. Asosiysi — intilish, mehnat qilish va o‘rganishga bo‘lgan qiziqishdir.